Almatyda óńirlik kommýnikatsiialar alańynda Almaty Kásipkerlik jáne investitsiialar basqarmasynyń basshysy Erkebulan Orazalinniń qatysýymen investitsiialyq jobalardy júzege asyrý týraly onlain brifing ótti, dep habarlaidy "Ult aqparat".
Erkebulan Orazalinniń keltirgen málimetteri boiynsha, 2020 jyldyń 10 aiynda pandemiia saldarynyń aiasynda saýda salasy quldyraǵan, soǵan qaramastan, óndiris jáne investitsiialar salasynda oń dinamika baiqalady.
Biyl qańtar-qazanda bólshek saýda kólemi 2 747 mlrd teńge boldy. Respýblikalyq kólemde Almatynyń bólshek taýar ainalymynyń úlesi 30,3% boldy. Atap aitqanda, azyq-túlik taýarlaryn satý 6,7%-ǵa ulǵaisa, azyq-túlik emes taýarlar saýdasy 14,3%-ǵa tómendedi.
Biyl qańtar-qazan ailarynda kóterme saýda ainalymynyń kólemi 7 978,2 mlrd teńge boldy. Respýblikalyq kólemde qalanyń kóterme taýar ainalymynyń úlesi 42,8%-dy qurady.
Sonymen birge, ónerkásipte oń serpin baiqaldy. 2020 jylǵy qańtar-qazan ailarynda 826,4 mlrd teńgege, onyń ishinde, óńdeý ónerkásibinde 670,4 mlrd teńgege ónim óndirildi.
Sondai-aq, pandemiiaǵa jáne karantinniń shekteý sharalaryna qaramastan, biyl Almaty qalasynda negizgi kapitalǵa salynǵan investitsiialar kóleminiń óskeni baiqalady.
2020 jyldyń 10 aiynyń ishinde negizgi kapitalǵa salynǵan investitsiialar - 719,2 mlrd teńgeni, jeke tulǵalyq kólem indeksi 116,9%-dy qurady.
Paidalaný baǵyttary boiynsha jyljymaityn múlikke – 323,4 mlrd teńge; ónerkásipke – 99 mlrd teńge; kólik jáne qoimalaýǵa – 69,4 mlrd teńge; densaýlyq saqtaý jáne áleýmettik qyzmet kórsetýge – 44,9 mlrd teńge; sondai-aq qarjy jáne saqtandyrý qyzmetine – 43,3 mlrd teńge investitsiia tartyldy.
Jyldyń sońyna deiin 90 investitsiialyq jobany iske asyrý josparlanyp otyr. Olardyń arasynda:
• quny 30,8 mlrd teńge bolatyn 9 áleýmettik joba;
• saýda jáne qyzmet kórsetý salasynda quny 15 mlrd teńge bolatyn 45 joba;
• ónerkásip salasynda quny 60,4 mlrd teńge bolatyn 17 joba;
• jyljymaityn múlik salasynda quny 68,5 mlrd teńge bolatyn 18 joba;
• kólik salasynda quny 1,5 mlrd teńge bolatyn 1 joba.
Jobalardy iske asyrý barysynda biyl 7,3 myńnan astam jumys ornyn qurý josparlanyp otyr.
Erkebulan Orazalin 2020 jyldyń qorytyndysy boiynsha megapolistiń negizgi kapitalyna salynǵan investitsiialar 900 mlrd teńgege óskenin aitty.
«Qalanyń investitsiialyq tartymdylyǵyn arttyrý úshin Almaty indýstrialdy aimaǵynyń aýmaǵyn keńeitý jolymen jeke investitsiialar tartý, «Alataý» ITP AEA negizinde farmatsevtikalyq klaster qurý josparlanyp otyr. Sondai-aq, jumys istep turǵan ónerkásip nysandarynyń negizinde iri developerlik jobalardy iske asyrý, qala ekonomikasynyń basym sektorlaryna investitsiialar tartý kózdelgen», - dedi Erkebulan Orazalin.
