Foto: Gov.kz
Biyl Almaty turǵyndary men qonaqtary Naýryz meiramyn keń kólemde toilaidy, qaladay is-sharalarda dástúr men jańashyldyq úilesim tabady, dep habarlaidy Ult.kz.
Qala ákimdiginiń baspasóz qyzmetiniń málimetinshe, ashyq aspan astyndaǵy aýqymdy kontsertter, sporttyq jarystar, jármeńkeler men túrli is-sharalar «Kóktóbe» saiabaǵynda, Abai alańynda, Panfilov jaiaý júrginshiler kóshesinde, Arbatta jáne Astana alańynda ótedi. Sonymen qatar, merekelik is-sharalar shahardyń barlyq aýdanynda uiymdastyrylady. Qala teatrlary men tsirk qaiyrymdylyq qoiylym usynsa, iri kontsert zaldarynda qazaqstandyq jáne sheteldik juldyzdar óner kórsetedi. Jalpy, Almatyda Naýryznama aiasynda 100-den astam is-shara ótedi.
Astana alańy
21 naýryz kúni saǵat 11:00-de Astana alańynda «Almaty – Naýryz qushaǵynda» atty negizgi saltanatty kontsert ótedi. Sahnada áigili «Dos-Muqasan» ansambli, Maira Muhamedqyzy, Janar Aijanova, Ómirqul Ainiiazov, Jazira Baiyrbekova, Igor Blagorodnyi, Tólegen Rahymbaev, «KeshYou» toby, Dinaia, AyaFunk jáne basqa da artister óner kórsetedi.
«Alataý» dástúrli óner teatrynyń jáne «Jańa ǵasyr» teatrynyń artister, «Almaty áýenderiniń» solisteri, «Sazgen sazy» folklorly-etnografiialyq ansambli de kontserttik baǵdarlama usynady.
Sonymen qatar, 21-22 naýryz kúnderi saǵat 18:00-de osy alańda tanymal ánshiler qatysatyn eki kúndik Juldyzdy Almaty keshki festivali ótedi.
Astana alańynda sporttyq oiyndar, qolóner jármeńkesi jáne otbasy múshelerimen qatysyp, qyzyqtaityn basqa da is-sharalar uiymdastyrylady. Munda merekelik kóńil-kúi syilaityn túrli fotozonalar men art-nysandar da ornatylady.
Abai alańy
21-25 naýryz kúnderi saǵat 10:00-den 16:00-ge deiin Abai alańynda mádeni mura men zamanaýi tehnologiiany biriktiretin NauryzFest festivali ótedi.
Respýblika saraiynyń aldynda erekshe bezendirilgen kiiz úiler tigiledi. «Rýhani mura» kiiz úiinde Abai, Jambyl jáne Dina oinaǵan mýzykalyq aspaptardyń kóshirmesi qoiylyp, kontsert ótedi. «Almatyǵa saiahat» kiiz úiinde qonaqtar qalanyń kórikti jerlerin virtýaldy formatta tamashalai alady. Sondai-aq, sheber Marat Beksultanovtyń qolynan shyqqan nebári 20 minýt ishinde qurastyrýǵa bolatyn «Innovatsiialyq kiiz úi» ornatylady.
Abai alańynda altybaqan ornatylady, ulttyq oiyndar men túrli jarystar ótkizedi. Sondai-aq Abai Qunanbaiulynyń 180 jyldyǵyna arnalǵan art-nysandar da boi kóteredi. 21-22 naýryz kúnderi keshki ýaqytta alańda belgili ánshiler kontsert qoiady.
Festival aiasynda birneshe kún boiy aýqymdy qolóner jármeńkesi jumys isteidi. Qonaqtar aǵash oiý, zergerlik buiym jasaý, bylǵary óńdeý jáne kiiz basý ónerin tamashalai alady. Kiiz úilerde sheberlik dáristeri uiymdastyrylyp, qonaqtar toqyma toqý, ulttyq oiý-órnekpen áshekei buiym daiyndaý jáne qazaqtyń dástúrli mýzykalyq aspaptaryn jasaý ónerin úirene alady.
Robottar, kinetikalyq týnnel jáne virtýaldy avatar
Panfilov jaiaý júrginshiler kóshesi (Qabanbai batyr kóshesinen Tóle bi kóshesine deiin) zamanaýi tehnologiia men mádeni keńistikke ainalady. Kireberiste erekshe áser beretin LED-ekrandy arka ornatylady, al Ǵalymjan atty virtýaldy avatar merekelik baǵdarlama týraly aityp beredi.
Munda halyq mýltimedialyq qondyrǵy arqyly ózin ulttyq kiim kiip turǵandai kóredi, tsifrlyq sýburqaqta júrekjardy lebizin joldap, VR arqyly ejelgi dáýirge saiahat jasap, sadaq atý saiysyna qatysady, virtýaldy shaiqasty tamashalaidy jáne Naýryz meiramynyń tarihyna úńiledi.
Bul alańda kinetikalyq týnnel ornatylyp, onda ulttyq oiý-órnekter qonaqtardyń qimylyna sai qozǵalady. Gastronomiialyq aimaqta robot daiashylar, aspazdar men baristalar jumys isteidi, al intellektýaldyq «Oi-Dýman» oiyny almatylyqtar men qonaqtardyń Naýryz týraly bilimin teksererýge múmkindik beredi. Panfilov kóshesinde «ǵaryshtyq kiiz úi», qaita óńdelgen materialdardan jasalǵan art-installiatsiialar men qazaqstandyq injenerler ázirlegen robototehnika kórmesi jumys isteitin bolady. Bul alań 21 jáne 22 naýryzd jumys isteidi.
Kitap jármeńkesi, jazýshylarmen kezdesýler jáne ulttyq oiyndar
21-25 naýryz kúnderi Almatynyń Arbatynda «Naýryz toiy – merekem, salt-dástúrim – berekem» atty iri kitap jármeńkesi ótedi. Qonaqtar jazýshylarmen, pýblitsistermen kezdesip, aqyndar men dástúrli óner sheberleriniń ónerin tamashalai alady. Jaiaý júrginshiler aimaǵynyń ortasynda shatyr ornatylyp, sheberlik dáristeri, ulttyq oiyndar boiynsha týrnirler jáne kórsetilimder uiymdastyrylady.
Abaidyń ánderin 5000 adam hormen oryndaidy
22 naýryz saǵat 9:30-da Almatyda Naýryz meiramy men uly Abai Qunanbaevtyń 180 jyldyǵyna orai aqynnyń ánderin oryndaý boiynsha aýqymdy hor performansy ótedi. Oǵan belgili solister, B.Baiqadamov atyndaǵy memlekettik hor kapellasynyń artisteri, mýzykalyq oqý oryndarynyń stýdentteri jáne qala turǵyndary, jalpy sany 5 mynan asatyn almatylyq qatysady. Olar Abai dańǵyly boiynda jinalyp, «Kózimniń qarasy», «Jelsiz túnde jaryq ai» jáne «Aittym sálem, Qalamqas» ánderin oryndaidy. Is-shara Abai dańǵyly boiynda (Nazarbaev pen Dostyq dańǵyldarynyń arasynda) ótedi.
Bul performans jańarý men birliktiń simvolyna ainalyp, qalany ulttyq mura rýhyna bóleidi. Myńdaǵan qatysýshynyń daýysy úilesim taýyp, qazaq mádenietiniń rýhani qýatyn beineleitin erekshe mýzykalyq týyndy týdyrady. Bul is-shara Rekordtar kitabyna enýi múmkin.
Almatyda Nauryz Fashion Day ótedi
18 naýryz kúni Almatyda saǵat 14:30-da Naýryznama onkúndigi aiasynda Ulttyq kiimder kúnine arnalǵan Nauryz Fashion Day aýqymdy sán kórsetilimi ótedi. Qyzyl kilemnen júrip ótetin modelder arasynda «Álemdi tańqaldyrǵan qazaq ájeleri» jobasynyń qatysýshylary, «Miss Qazaqstan» jobasynyń jeńimpazdary bolady, sondai-aq is-sharaǵa AtelierRaushan atelesi men Aida KaumeNOVA sán úii qatysyp, ulttyq stildegi ádemi toptamalaryn kórsetedi.
Aita keteiik, Nauryz Fashion Day-ge qatysýshy modelderdiń arasynda buǵan deiin Italiianyń Milan qalasynda ótken sán aptalyǵynda óner kórsetken, endi Niý-Iork pen Parijdegi Fashion Week-ke qatysýdy josparlap otyrǵan, qazaq ulttyq kiimderin álem elderinde dáripteýshi apalar bar.
Sondai-aq, uiymdastyrýshylar barsha qala turǵyndaryn atalmysh is-sharana tamashalaý úshin etnostilde kiinip kelýge shaqyrady. Sol arqyly Naýryznama aiasynda Ulttyq kiimder kúnin qoldap, Nauryz Fashion Day-diń qatysýshysy bolýǵa múmkindik bar.
Ótetin orny: Jibek joly kóshesi, Arbat
Túrki áleminiń tanymal juldyzdary
Túrkitildes elderdiń belgili artisteri almatylyqtar men shahar qonaqtaryn Naýryz meiramymen quttyqtaidy. 22 naýryz kúni saǵat 20:00-de «Almaty Arena» sahnasynda «Túrki áleminiń mega juldyzdary» kontserti ótedi. Oǵan Sadraddin, Mustafa Sandal, Roza Zergerli, Aleksei Chýmakov, Burak Özçivit jáne «Tynda Music» orkestri qatysady.
20-25 naýryz aralyǵynda metro beketterde mýzykalyq performanstar men mýzei kórmeleri ótedi.
Sondai-aq, qalada Naýryznama kúntizbesindegi ár kúnniń ideologiiasy men mánin kórsetetin birqatar taqyryptyq is-shara ótedi. Baǵdarlamada senbilikter, qaiyrymdylyq aktsiialary, qoiylymdar, oiyndar jáne túrli is-shara bar. Tolyq keste Almaty qalasy ákimdiginiń saitynda jariialanǵan.
