Almatyda jańa týǵan náresteni dárethana shuńqyrynan aman alyp shyqqan politseige maior sheni berildi, - dep habarlaidy "Ult aqparat" Polisia.kz Telegram kanalyna silteme jasap.
"Ishki ister ministri Marat Ahmetjanovtyń buiryǵymen politsiia kapitany Nurjan Shatýnov óziniń qyzmettik mindetterin adal atqarǵany, balany qutqarý kezinde kórsetken batyldyǵy, erligi men janqiiarlyǵy úshin maior ataǵyn aldy", - delingen habarlamada.
Al leitenant Ǵaziz Hamasqaliev úsh jalaqy mólsherinde syiaqy alady.
Eske salaiyq, keshe túnde qalanyń Túrksib aýdanynda jańa týǵan náresteni qutqaryldy.
"Bizge túngi saǵat ekide kámeletke tolmaǵan qyzdyń túsik tastaǵandyǵy týraly qońyraý kelip tústi. Ol qaladaǵy aýrýhanalardyń birine jatqyzyldy. Dárigerlermen sóileskennen keiin men oqiǵa ornyna baryp, tekserýdi jón kórdim. Basyma "bala qaida?" degen suraq keldi. Qyzdyń anasynan oqiǵa oryn alǵanǵa deiin onyń syrttaǵy dárethanada biraz ýaqyt bolǵanyn bildim. Dárethana ishinen qan izderin taýyp, ishinde jatqan balany kórdim. Ol dem alyp jatty.
Osy kezde tergeý-jedel toby keldi, onyń quramynda kriminaldyq politsiia bóliminiń jedel ýákili Ǵaziz Hamasqaliev boldy. Biz dárethananyń edeninen taqtalardy tez alyp tastadyq. Áriptesim Ǵaziz tómen túsip, balany qyzmettik kóilegine orap, abailap shyǵaryp aldy. Sol kezde náreste jylady. Bárimiz mazasyz kúide edik, ýaiymdadyq. Balany tez arada dárigerlerge tapsyrdyq", - degen edi Nurjan Shatýnov.
