الماتىدا جاڭا تۋعان نەرەستەنٸ دەرەتحانا شۇڭقىرىنان امان الىپ شىققان پوليتسەيگە مايور شەنٸ بەرٸلدٸ, - دەپ حابارلايدى "ۇلت اقپارات" Polisia.kz Telegram كانالىنا سٸلتەمە جاساپ.
"ٸشكٸ ٸستەر مينيسترٸ مارات احمەتجانوۆتىڭ بۇيرىعىمەن پوليتسييا كاپيتانى نۇرجان شاتۋنوۆ ٶزٸنٸڭ قىزمەتتٸك مٸندەتتەرٸن ادال اتقارعانى, بالانى قۇتقارۋ كەزٸندە كٶرسەتكەن باتىلدىعى, ەرلٸگٸ مەن جانقييارلىعى ٷشٸن مايور اتاعىن الدى", - دەلٸنگەن حابارلامادا.
ال لەيتەنانت عازيز حاماسقاليەۆ ٷش جالاقى مٶلشەرٸندە سىياقى الادى.
ەسكە سالايىق, كەشە تٷندە قالانىڭ تٷركسٸب اۋدانىندا جاڭا تۋعان نەرەستەنٸ قۇتقارىلدى.
"بٸزگە تٷنگٸ ساعات ەكٸدە كەمەلەتكە تولماعان قىزدىڭ تٷسٸك تاستاعاندىعى تۋرالى قوڭىراۋ كەلٸپ تٷستٸ. ول قالاداعى اۋرۋحانالاردىڭ بٸرٸنە جاتقىزىلدى. دەرٸگەرلەرمەن سٶيلەسكەننەن كەيٸن مەن وقيعا ورنىنا بارىپ, تەكسەرۋدٸ جٶن كٶردٸم. باسىما "بالا قايدا?" دەگەن سۇراق كەلدٸ. قىزدىڭ اناسىنان وقيعا ورىن العانعا دەيٸن ونىڭ سىرتتاعى دەرەتحانادا بٸراز ۋاقىت بولعانىن بٸلدٸم. دەرەتحانا ٸشٸنەن قان ٸزدەرٸن تاۋىپ, ٸشٸندە جاتقان بالانى كٶردٸم. ول دەم الىپ جاتتى.
وسى كەزدە تەرگەۋ-جەدەل توبى كەلدٸ, ونىڭ قۇرامىندا كريمينالدىق پوليتسييا بٶلٸمٸنٸڭ جەدەل ۋەكٸلٸ عازيز حاماسقاليەۆ بولدى. بٸز دەرەتحانانىڭ ەدەنٸنەن تاقتالاردى تەز الىپ تاستادىق. ەرٸپتەسٸم عازيز تٶمەن تٷسٸپ, بالانى قىزمەتتٸك كٶيلەگٸنە وراپ, ابايلاپ شىعارىپ الدى. سول كەزدە نەرەستە جىلادى. بەرٸمٸز مازاسىز كٷيدە ەدٸك, ۋايىمدادىق. بالانى تەز ارادا دەرٸگەرلەرگە تاپسىردىق", - دەگەن ەدٸ نۇرجان شاتۋنوۆ.
