Almatyda qashyqtan oqytý úshin muǵalimder men oqýshylarǵa 10 myńnan astam kompiýter berildi. Bul týraly Almaty ákimi Baqytjan Saǵyntaev Instagram paraqshasynda jazdy, dep habarlaidy "Ult aqparat".
«Bul karantin kúndelikti ómirimizdegi barlyq salaǵa, sonyń ishinde bilim berý protsesine de ózgeris engizdi. Tótenshe jaǵdai rejiminiń birinshi kúninen-aq mektepterdi qashyqtan oqytýǵa kóshirýge daiarlai bastadyq. Eń aldymen muǵalimderge arnalǵan treningter ótip, 99% nemese 273 myń oqýshyny qamtyǵan synaq sabaqtary uiymdastyryldy. «Almaty» telearnasynan kórsetýge bolatyn 100-den asa beinesabaq ázirlendi», - dep jazdy ákim.
Sondai-aq, ol qashyqtan oqytý úshin muǵalimder men oqýshylarǵa 10 myńnan astam kompiýter berilgenin aitty.
Tehnikalyq jabdyqqa keler bolsaq, karantin kezinde mektepterdegi 10 myńnan astam kompiýter muǵalimder men oqýshylarǵa berildi. Qosymsha úsh myń noýtbýkty satyp alý máselesi sheshilýde. Úiinde tórt jáne odan da kóp oqýshy balasy bar jáne barlyǵynyń bir kompiýterden bilim alýǵa shamasy jetetin otbasylar bar. Olardy qosymsha tehnikamen qamtamasyz etetin bolamyz. Bailanys operatorlarymen birlesip, tórt myń oqýshy men 700 muǵalimge ǵalamtor jelisiniń qoljetimdi bolýyn qarastyrýdamyz», – deidi Baqytjan Saǵyntaev.
Baqytjan Saǵyntaev ata-analardan qoldaý kórsetýlerin surady.
«Ata-analardyń balalarǵa qoldaý kórsetip, muǵalimderdiń onlain sabaǵyn ótkizýine kómektesýin suraimyn. Úide otyrsaq ta, ózimizdi jan-jaqty damytyp, ári koronavirýstyń beleń almaýyna úles qosyp jatyrmyz», – dep jazdy shahar basshysy.
