Almaty qalasy ákiminiń orynbasary Erjan Babaqumarov SOVID-2019 indetine shaldyqqan jáne olarmen bailanysta bolǵan adamdarǵa arnalǵan jańa modýldik aýrýhananyń qurylys alańynda bolyp, meditsinalyq uiymnyń josparymen egjei-tegjeili tanysty, dep habarlaidy "Ult aqparat".
Jobaǵa sáikes, meditsinalyq uiym aýmaǵynda koronavirýstyq infektsiiamen aýyratyn naýqastardy oqshaýlaý jáne emdeý úshin 280 oryn ashylady, sonyń ishinde qarqyndy terapiia bólimshesi jumys isteitin bolady.
Aýrýhanada qyzmetkerlerge arnaiy «taza» aimaqtar belgilengen, infektsiialyq palatalarda bólek jeldetý júiesi qarastyrylatyn bolady.
Qazirgi tańda densaýlyq saqtaý basqarmasymen qajetti meditsinalyq jabdyqtarmen jaraqtandyrý máselesi qarastyrylýda. Meditsinalyq qyzmetkerlerdi jabdyqtaý boiynsha jumystar júrgizilýde. Jospar boiynsha shtat shamamen 280 dáriger men meditsina qyzmetkerlerinen quralady.
Sondai-aq, Almaty qalasy Qalalyq josparlaý jáne ýrbanistika basqarmasynyń basshysy Almashan Ahmedjanov salynyp jatqan gospital jaqyn ornalasqan qorǵan keshenine áser etpeitinin baiandady.
«Qorǵan kesheni tarihi-mádeni qordyń bas josparyna sáikes qorǵalýda. Aýrýhanadan qorǵandarǵa deiingi qashyqtyq 150 metrden asady. Qorǵandardyń kúzet aimaǵy 50 metrdi quraidy. Barlyq erejeler saqtalýda», – dedi Almaty qalasynyń bas sáýletshisi.
Qalalyq mádeniet basqarmasynyń málimetterine sáikes, qurylys jumystary bastalar aldynda Almaty qorǵandarynyń ainalasyndaǵy qorǵaý aimaqtary eskerildi. Salynyp jatqan modýldik qurylym Qorǵannyń qorǵaý aimaǵynan 50 metr qashyqtyqqa sozylyp, oǵan eshqandai zaqym keltirilmegen. Qorǵan óz aýmaǵynan modýldik qurylymǵa deiin 170 metr qashyqtyqta, qorǵanys aimaǵynan 50 metr qashyqtyqta ornalasqan.
Óz kezeginde Á.H.Marǵulan atyndaǵy Arheologiia institýtynyń bas ǵylymi qyzmetkeri Arnabai Nurjanov júrgizilgen saraptamalyq taldaýdyń qorytyndysy týraly habarlady.
«Biz qurylys josparymen tanystyq. Aýrýhana aýmaǵy tolyǵymen qorshalady. Qorǵanǵa deiingi shekaralyq aimaq 150 metr qashyqtyqta ornalasqan. Qorǵandardyń kúzet aimaǵy bólek bolady. Aita ketý kerek, aýrýhana qurylysy qorǵandarǵa eshqandai qaýip tóndirmeidi», - dedi Arnabai Nurjanov.
Máseleni sheshý jáne qurylys alańyn baqylaý barysynda Almaty qalasy ákiminiń orynbasary Erjan Babaqumarovpen qorǵan kesheniniń rekreatsiialyq jospary jasaý qajettiligi alǵa tartyldy.
Sonymen qatar, Almaty aýmaǵynda ornalasqan Qorǵandyq keshenderdi odan ári damytý keńesin qurý usynyldy. Onyń quramyna arheologtar men tarihshylar qatarynan sarapshylar kiretin bolady.
Esterińizge sala keteiik, aǵymdaǵy jyldyń 3 sáýirinde QR Prezidenti janyndaǵy Tótenshe jaǵdaidy qamtamasyz etý jónindegi memlekettik komissiia koronavirýstyń taralýyna qarsy kúres sharalaryn júzege asyrý aiasynda Almaty qalasynyń aýmaǵynda gospital salý týraly sheshim qabyldaǵan bolatyn.
