Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin jumys saparymen Almaty qalasyna keldi, dep habarlaidy "Ult aqparat".
Qazaqstan Respýblikasynyń Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin jumys saparymen Almaty qalasyna keldi.
Vedomstvo basshysy qalany tsifrlandyrý barysymen tanysyp, birqatar nysandardy aralady.
Sapar barysynda ministr Baǵdat Mýsin Almaty qalasynyń ákimi Baqytjan Saǵyntaevpen kezdesip, megapolisti tsifrlandyrý salasyndaǵy aǵymdaǵy jaǵdaidy jáne aldaǵy jylǵa josparlardy talqylady.
Sondai-aq, Baǵdat Mýsin men Baqytjan Saǵyntaev ákimdiktiń tapsyrysy boiynsha «Zerde» holdingi ázirlegen Almaty qalasynyń IT-arhitektýrasyna qol qoidy.
Bul ońtaily baǵyttardy odan ári damytý jáne «SmartCity» platformasyn iske asyrý joldaryn aiqyndaýǵa jáne basym jobalardyń tizbesin qalyptastyrýǵa múmkindik beredi.
Ministr Qazaq onkologiia jáne radiologiia ǵylymi-zertteý institýtynda bolyp, oǵan «Crystal Spring» júiesin tanystyrdy.
Júie jasandy intellekt (JI) arqyly rentgen sýretteri negizinde ókpeniń onkologiialyq aýrýlaryn diagnostikalaýǵa múmkindik beredi.
Búgingi tańda JI ókpe aýrýlarynyń 14 túrli belgilerin, onyń ishinde pnevmoniiany Covid-19 kórinisteriniń biri retinde anyqtai alady.
Ónim 2020 jylǵy naýryzda birneshe klinikalarda synaq rejiminde iske qosyldy. Qazirgi ýaqytta dárigerler ony kúndelikti qoldanady.
Baǵdat Mýsin Almaty qalasyndaǵy eń iri kópsalaly klinika – №7 Qalalyq klinikalyq aýrýhananyń jumysymen tanysty. Ministrge «Almaty jasandy intellekt zerthanasy» ázirlegen CEREBRA jobasy tanystyryldy.
CEREBRA dárigerlerge insýltty erte satysynda anyqtaýǵa kómektesedi.
Tolyq saraptamalyq esepti kompiýterdegi veb-platformadan jáne iOS jáne Android-taǵy mobildi qosymshalardan alýǵa bolady.
Meditsinalyq mamandar atap ótkendei, insýlt kezinde miǵa qan aǵynyn qalpyna keltirý barlyq fýnktsiialardyń tolyq qaitarylýymen 4,5 saǵat ishinde múmkin bolady.
CEREBRA jobasyna engizilgen JI insýltty 10 minýt ishinde tanýǵa jáne insýlt iadrosyndaǵy tinderdiń tyǵyzdyǵynyń ózgerýin esepteýge kómektesedi.
«Almaty jasandy intellekt zerthanasy» Astana Hub IT-startaptar halyqaralyq tehnoparkiniń qatysýshysy bolyp tabylatynyn atap ótý qajet.
Baǵdat Mýsin osyndai jobalardyń mańyzdylyǵyn jáne Qazaqstanda, ásirese meditsina salasynda JI damytý qajettiligin atap ótti.
Sondai-aq, ministr jasandy intellekt «Tsifrlyq Qazaqstan» baǵdarlamasynyń basym klasterleriniń biri bolyp tabylatynyn jáne ministrlik startaptarmen, zertteý uiymdarymen jáne biznespen birlesip jumys júrgizip jatqanyn, onyń arqasynda osyndai sheshimder iske asyrylyp jatqanyn atap ótti.
Budan basqa, vedomstvo basshysy Qazaqstan-Britan tehnikalyq ýniversitetine, «Innovatsiialyq tehnologiialar parki» derbes klasterlik qoryna baryp, Almatynyń IT-qaýymdastyǵymen kezdesý ótkizdi.
