Metro vagonynyń artyna jabysyp alǵan ekstremal-bloger jaýapqa tartyldy, dep habarlaidy "Ult aqparat".
Jas jigit áleýmettik jelide tanymal bolý úshin metroǵa jabysyp, ony kameraǵa túsirgen.
«Ol óziniń áreketin ómiri men densaýlyǵyna jáne basqa da jol qozǵalysyna qatysýshylarǵa qaýip tóndiretinin bilmedi dep oilamaimyn. Ch. esimdi azamat zańǵa sáikes sharalar qabyldaý úshin tártip saqshylary ony izdeitinin bildi. Sondyqtan ol jasyrynǵan. Alaida keshe keshke ol ustalyp, QR Ákimshilik quqyq buzýshylyq týraly kodeksiniń 560-baby («Temir jol kóligi quraldaryn paidalaný erejelerin buzý») boiynsha ákimshilik jaýapkershilikke tartyldy. Sonymen qatar, Ch. esimdi azamatqa qatysty túsindirý jumysy júrgizildi», - deidi metropolitendegi politsiia basqarmasynyń basshysy Timýr Ósekbaev.
Aita keteiik, blogerdiń videosy 2 qarashada «SHERIFF Almaty» arnasynda «Zatsep metro Almaty» degen ataýmen jariialanǵan. Ol poiyzdyń art jaǵyndaǵy tirkemesine jabysyp alyp, «Almaly» stansasynan bastap «Abai» stansasyna deiin jetken.
