Megapolis ákimi Baqytjan Saǵyntaev «Almaty» telearnasyndaǵy tikelei efirde meditsinalyq kómektiń sapasy men qoljetimdiligin arttyrý mindetteriniń qalai sheshilip jatqanyn aitty, dep habarlaidy "Ult aqparat".
Baqytjan Saǵyntaevtyń aitýynsha, qala turǵyndaryn qoljetimdi jáne sapaly meditsinalyq qyzmettermen qamtamasyz etý – Almaty ákimdiginiń basty mindetteriniń biri. Osyǵan orai qalalyq densaýlyq saqtaý júiesi tereń jańarýdan ótip jatyr. Pandemiia óz rólin oinady, bul megapolistiń densaýlyq saqtaý júiesin nyǵaitý jumystaryn jedeldetýge májbúr etti. Infraqurylymdy salý, materialdyq-tehnikalyq bazany nyǵaitý, meditsina qyzmetkerleriniń biliktiligin arttyrý máseleleri sheshilýde.
«Byltyr densaýlyq saqtaýdyń 5 nysany paidalanýǵa berildi. Atap aitqanda, sáýir aiynda paidalanýǵa berilgen Alataý aýdanyndaǵy 280 tósek-oryndy modýldi aýrýhana. Qazan aiynda Naýryzbai aýdanynda 300 tósek-oryndy jańa modýldi infektsiialyq statsionar paidalanýǵa berildi. Jeltoqsan aiynda Túrksib aýdanynda 500 tósek-oryndy jańa infektsiialyq statsionar iske qosyldy»,- dedi ákim.
Meditsinalyq uiymdardyń materialdyq-tehnikalyq jabdyqtalýyn jaqsartý úshin 2020 jyly jergilikti biýdjetten 43,1 mlrd teńge bólindi. Aýrýhanalar men emhanalar úshin 11 myńnan astam birliktegi meditsinalyq jabdyqtar satyp alyndy, reanimatsiia bólimderi 100% jabdyqtaldy.
Diagnostikalyq qyzmettiń sapasyn arttyrý úshin qala statsionarlaryna 4 KT jáne bir MRT apparattary satyp alyndy. Jedel járdem qyzmeti úshin zamanaýi reanimatsiialyq qurylǵylarmen jabdyqtalǵan 135 arnaiy kólik satyp alyndy.
Modernizatsiialaýdyń úsh jyldyq baǵdarlamasyna sáikes barlyq meditsinalyq uiymdardyń materialdyq-tehnikalyq bazalary nyǵaitylýda. Biyl meditsinalyq jabdyqtar satyp alýǵa jergilikti biýdjetten 27 mlrd teńge kóleminde ekinshi transh bólindi.
Emhanalardy meditsinalyq ottegimen qamtamasyz etýdiń qalalyq baǵdarlamasy qabyldandy. Qaladaǵy 16 aýrýhananyń barlyǵy ottegi stantsiiasymen, sonymen qatar vakýýmdyq jáne kompressorlyq júielermen jabdyqtalǵan.
Infektsiialyq qaýipsizdikti qamtamasyz etý maqsatynda meditsinalyq qaldyqtardy joiý baǵdarlamasy qabyldandy, onyń aiasynda qalanyń infektsiialyq aýrýhanalarynda qaýipti meditsinalyq qaldyqtardy joiýǵa arnalǵan 11 qondyrǵy salyndy. Sondai-aq, osy maqsatta biyl infektsiialyq aýrýhanalardyń aǵyndy sýlaryn zalalsyzdandyrý baǵdarlamasy júzege asyrylady.
Baqytjan Saǵyntaevtyń aitýynsha, «qadamdyq qoljetimdilik» qaǵidaty boiynsha meditsinalyq qyzmettermen qamtamasyz etý jalǵasýda. Osyǵan bailanysty ambýlatoriialyq-emhanalyq uiymdar salý josparlary túzetildi.
Biyl 9 otbasylyq -dárigerlik ambýlatoriia men 3 emhana salý, sondai-aq 4 densaýlyq saqtaý nysanyn seismikalyq nyǵaitý josparda.
Qalanyń shetki aýdandarynda qymbat klinikalyq-diagnostikalyq qyzmetterdiń qoljetimdiligin qamtamasyz etý úshin tórt modýldik KT ortalyǵyn salý josparlanǵan.
Jalpy, 2020-2024 jyldarǵa arnalǵan «Jańa Almaty» keshendi damý jospary aiasynda densaýlyq saqtaýdyń 28 nysanyn salý jáne rekonstrýktsiialaý josparlanýda, qazir 18 nysannyń jobalyq-smetalyq qujattary ázirlenýde.
Olardyń barlyǵy zamanaýi qondyrǵylarmen jabdyqtalady, al jumys meditsinalyq kómek kórsetýdiń zamanaýi talaptaryna sai júretin bolady.
