Almaty qalasy Respýblika saraiynda «Meiirimdi Muhammed ﷺ» rýhani máýlit keshi ótti. Rýhani keshtiń uiymdastyrýshysy – QMDB Almaty qalalyq Ortalyq meshiti.
Keshke QMDB Tóraǵasy, Bas múfti Naýryzbai qajy Taǵanuly qatysyp, jinalǵan halyqty quttyqtap arnaiy baiandama jasady. Almaty qalasy ákiminiń quttyqtaý hatyn qalalyq din isteri basqarmasynyń basshysy Nurlan Qiqymov oqyp berdi. Máýlit keshine demeýshilik jasaǵan kásipker Bahreddin Nuǵmanuly jáne ziialy qaýym ókilderi, aqsaqaldar, meshit jamaǵaty men imamdar qatysty.
Aqyn, sazger Jáken Omarov jyldaǵy dástúrmen paiǵambarymyzdyń ómirbaianyn qazaq tilinde jyrlap, biyl hijrettiń 4-5 jyldar oqiǵasyn baiandady. Buǵan deiingi máýlit merekelerinde Paiǵambarymyzdyń balalyq shaǵy, odan keiin paiǵambarlyqtyń kelýi, miǵrajǵa kóterilýi, odan keiin hijrettiń alǵashqy jyldary men Bádir soǵysy, Ýhýd soǵysy, hazreti Hamzanyń sheiit bolýyna toqtalǵan bolatyn.
Máýlitke arnalǵan merekelik sharada «Óner qyrandary» teatry ujymy sahnalyq qoiylymdar qoidy. Bul kórinisterde Allaǵa táýekel etý, teris qylyqtardan aýlaq bolý, durys dos tańdai bilý, bala tárbiesindegi ata-ananyń roli t.b. mándi dúnieler baiandaldy. «Has-Saq» etno-folklorlyq ansabli, Qanatbek Polatbek jáne Rinat Tóre syndy estrada ánshileri iláhi ánder oryndap, paiǵambarǵa degen saǵynyshtaryn ánmen jetkizdi. Sonymen qatar Paiǵambar súnnetin ómirine temirqazyq etip ósip kele jatqan jas jetkinshekter paiǵambarymyz jaily poeziia oqydy. Paiǵambar ómirinen mol maǵlumat beretin kórme uiymdastyrylyp, kórermen nazaryna usynyldy.
Biylǵy rýhani Máýlit keshiniń ereksheligi kórermen suraýy boiynsha bir kúnde eki ret qoiylym kórsetildi. Tańǵy jáne túski qoiylym barysynda Respýblika saraiy kórermenge lyq toldy. Kesh sońynda Bas múfti rýhani is-sharanyń ótýine demeýshilik jasaǵan belgili metsenat Baharidin Nuǵmanulyn «Qazaqstan musylmandary dini basqarmasyna 30 jyl» merekelik medalmen marapattady. Sondai-aq merekelik baǵdarlamaǵa úles qosqan belgili jyrshy Jáken Omarovqa, «Óner qyrandary» men «HasSak» ujymyna alǵys hatyn tabystap, rizashylyq nietin jetkizdi. Sonymen qatar biletten túsken qarajattan «Máýlit syiy» retinde «Nur-Múbarak» Egipet islam ýniversitetiniń jańa ǵimaratynyń qurylysyna 4 000 000 teńgeniń sertifikaty berildi. Jáne de kómekke muqtaj azamattarǵa qarjylai sertifikattar tabystaldy. «El úlesi - páterge» jobasy boiynsha Respýblika boiynsha 596-baspana, Almaty qalasy boiynsha 20-baspana kiltin Túrksib aýdandyq «Mekke» meshitiniń imamy, 7 balanyń ákesi Rahmatýlla Mollaqaǵanatulyna tabystady. Budan bólek Almaty Ortalyq meshitiniń janynan ashylǵan onlain Quran kýrsynyń belsendi ustazyna tosyn syi retinde umra qajylyǵynyń sertifikaty berildi. Kórermenderge máýlit keshine arnaiy jazylǵan «Paiǵambarymyzdy ﷺ tanisyz ba?» kitaby men múftiiattyń tól basylymy «Munara» gazeti jáne «Iman» jýrnaly tegin taratyldy.
Sharanyń basty maqsaty – paiǵambarymyzǵa salaýat aitý, onyń asyl qasietterin dáripteý, halyq arasynda imandylyqty nasihattai otyryp, turaqtylyq pen tynyshtyqqa úndeý bolyp tabyldy.
