Almatyda Áshimov kóshesi boiyndaǵy lombardqa qaraqshylyq shabýyl jasaldy, dep habarlaidy QazAqparat.
Almaty qalalyq Politsiia departamenti baspasóz qyzmetiniń málimetinshe, Naýryzbai aýdanynda ornalasqan lomardqa qoldarynda tapansha men pyshaǵy bar eki er adam shabýyl jasady. Dál sol kezde lombard mańynan ýchaskelik politsiia inspektorlary Qanat Parmanov pen Erlan Qosaliev ótip bara jatqan.
«Ýchaskelik politsiia inspektorlary - politsiia maiory Qanat Parmanov pen politsiia kapitany Erlan Qosaliev ózderiniń ákimshilik aimaqtarynda júrgen. Áshimov kóshesiniń boiyndaǵy lombardtan kómekke shaqyrǵan áieldiń daýsyn estidi. Sol kezde lombardtyń ishinen tapansha jáne pyshaqpen qarýlanǵan eki adam júgirip shyqqan, olar politsiia qyzmetkerlerin kórip, qashyp ketpek bolǵan. Kúdiktiler ustaldy», - dedi Naýryzbai aýdandyq politsiia basqarmasynyń bastyǵy Didar Ahanov.
«Men olardyń artynan júgirip shyqtym. Qarasam eki politsiia qyzmetkeri olarmen tóbelesip jatyr eken. Kúdiktiler qashyp ketpek boldy. Biraq politseiler oǵan jol bermedi. Men politsiia qyzmetkerlerine rizashylyǵymdy bildirip, alǵys aitqym keledi. Rahmet!», - dedi, lombard qyzmetkeri Elmira Úsenbaeva.
Bul fakt sotqa deiingi tergeýdiń biryńǵai tiziliminde QR QK-niń 192 baby 2 bólimi 1 tarmaǵy boiynsha tirkeldi.
«Kúdiktilerdiń ekeýi de Jambyl oblysynyń turǵyndary. Belgili bolǵandai, olar Almatyǵa qylmystyq jolmen aqsha tabý maqsatynda kelgen. Olardyń biri - 2000 jyly týǵan J. atty azamat, buryn adam tonaǵany úshin sottalǵan. Onyń sybailasy - Q. esimdi azamat, 2001 jyly týǵan. Qylmys ornynda jedel-tergeý toby «Baikal» tapanshasyn, as úi pyshaǵyn, qolǵap, qara betperde, ártúrli ataýdaǵy 24 dana altyn salynǵan qorap tárkiledi. Qylmystyq is aiasynda tiisti saraptamalar taǵaiyndaldy. Kúdiktiler ýaqytsha ustaý izoliatoryna qamaldy», - dedi D. Ahanov.
