Almatydaǵy "Alǵabas" shaǵyn aýdanynda egde jastaǵy er adam lift shahtasyna qulap ketti. "Almatylift" kompaniiasynyń ókili oqiǵanyń mán-jaiyn aityp berdi, dep jazady Sputnik agenttigi.
Oqys oqiǵa Almaty qalasyndaǵy "Alǵabas-6" shaǵyn aýdanyndaǵy №144 úide 13 aqpanda saǵat 16:20 shamasynda bolǵan.
Qalalyq politsiia departamenti baspasóz qyzmetiniń habarlaýynsha, 59 jastaǵy er adam oqys oqiǵa saldarynan mert bolǵan. Osyǵan bailanysty QR Qylmystyq kodeksiniń 306-baby, iaǵni "Qaýipsizdik talaptaryna jaýap bermeitin taýardy shyǵarý nemese satý, qyzmet kórsetý" boiynsha tergeý bastaldy.
Aldymen er adam qulap ketken jedelsatynyń ishinde kóz jumdy degen aqparat taraǵan. "Almatylift" JShS Sputnik Qazaqstan tilshisine bul jaittyń basqalai bolǵanyn aityp berdi.
"Basynda bizge jedelsatynyń kabinasy qulap ketti degen aqparat tústi. Anyqtai kelsek, kabina altynshy qabatta turǵan bolyp shyqty. Shamamen keshki 20.00 kezinde bizge osy úidiń jedelsatysy istemei turǵany jaily aryz túsken. Biz birden jumys brigadasyn jiberdik, al olar liftiniń esigi buzylyp jatqanyn kórgen. Mehanik birinshi qabatqa túsip, liftini ashqanda tómende er adam jatqan. Jigitter birden politsiia men jedel járdemdi shaqyrǵan", - dep túsindirdi "Almatylift" JShS direktorynyń orynbasary Maksim Telitskii.
Odan soń mamandar PIK-ke (KSK) baryp, sol úidiń beinebaqylaý taspasyn aldyrypty. Odan jedelsatynyń 6-qabatta turyp qalǵany anyqtalǵan.
"Er adam 5-qabatta lift shaqyrǵan. Beinebaqylaý taspasyndaǵy jazbada kórinip turǵandai, ol ózin bir túrli ustaǵan, táltirektep áreń tur. Esikti uryp, ony buzǵanyn da kórýge bolady. Ol kabina joǵyn kórdi de. Biraq soǵan qaramastan alǵa qadam jasap, qulap ketti", - dep tolyqtyrdy Telitskii.
Qazir oqys oqiǵaǵa bailanysty tergeý amaldary júrip jatyr. Soǵan bailanysty jedelsaty iske qosylmaǵan.
"Almatylift"ókiliniń aitýynsha, bul 2015 jyly ornatylǵan jańa importtyq jedelsaty bolǵan. Jedelsatylar jyl saiyn tekserilip otyrǵan. Sońǵy ret 2018 jyly 13 shildede tekserilgen eken. Bul joly jospar boiynsha úsh kúnnen keiin "Almatylift" mamandary osy úidegi jedelsatynyń tehnikalyq jaǵdaiyn tekserýi tiis bolǵan. Al jedelsatynyń neden isten shyqqany ázirge belgisiz.
