foto: pixabay.com
Almatyda Toyota Land Cruiser Prado jol talǵamaityn kóligi gaz qubyryn qaǵyp, júzdegen úi gazsyz qaldy. Bul týraly politsiia departamentiniń baspasóz qyzmeti málim etti.
Qalalyq politsiia departamentiniń baspasóz qyzmetiniń habarlaýynsha, jol apaty 6 qarashada saǵat 13:45-te Túrksib aýdanynda bolǵan.
Toyota júrgizýshisi ainalma jolmen kele jatyp, Jeltoqsan saiabaǵyndaǵy gaz qubyrynyń metalldan jasalǵan tiregine soǵylǵan. Sodan keiin kólik ońǵa qarai aýdarylǵan. Jol talǵamaityn kóliktiń júrgizýshisi men jolaýshysy meditsinalyq kómekke júgingen.
Aýdandyq politsiia bóliminiń qyzmetkerleri oqiǵanyń mán-jaiyn anyqtaýda.
Zakon.kz tilshileriniń QazaqGaz Aimaq kompaniiasyna silteme jasap habarlaýynsha, Toyota Land Cruiser Prado kóligi shamamen 10 metr gaz qubyryn zaqymdaǵan, alty tirek deformatsiialanyp, gazdyń dalaǵa ketýine sebep bolǵan.
653 abonent gazsyz qaldy.
