Foto: depositphotos.com
Almatynyń infektsiialyq statsionarlary qyzylsha aýrýy órshýine bailanysty 90 paiyzǵa toldy, - dep habarlaidy Tengrinews.kz saity.
Qalalyq balalar klinikalyq juqpaly aýrýlar aýrýhanasynda qyzylshamen aýyratyn balalardy emdeýge arnalǵan 280 tósek-orny bar jeti bólimshe (onyń ishinde 12 tósek reanimatsiia bólimshesinde) ornalastyrylǵan. Onyń ishinde Saialy filialyndaǵy bir bólimshe, Baizaqov kóshesindegi statsionarda jáne Aport filialynda úsh bólimsheden bar. Sondai-aq rezervte 40 tósek bar.
S. Jekenova atyndaǵy qalalyq klinikalyq juqpaly aýrýlar aýrýhanasyna da 120 oryndyq kereýetter ornalastyrylypty, onyń ishinde 108 kereýet bos emes.
Almaty qalasy sanitariialyq-epidemiologiialyq baqylaý departamenti málimetinshe, qazir qyzylsha boiynsha turaqsyz epidemiologiialyq jaǵdai baiqalyp otyr. Almatyda naýryzdan bastap zerthanalyq jolmen rastalǵan 2509 jaǵdai tirkeldi, onyń 1994-i 14 jasqa deiingi balalar arasynda (79,4 paiyz) anyqtaldy.
Al byltyr qalada zerthanalyq jolmen rastalǵan qyzylsha men qyzamyq tirkelgen joq. Aýyrǵan 1994 balanyń 1880-i ekpe almaǵan (94,2 paiyz), onyń ishinde vaktsinatsiiadan bas tartqan 1354 jaǵdai bolǵan (72,02 paiyz), meditsinalyq qarsy kórsetilimderi bar 260 jaǵdai bolsa(13,8 paiyz), 259 jaǵdaida (13,7 paiyz) ekpe alatyn jasqa jetpegen. Basqa sebeptermen ekpe almaǵan 6 jaǵdai tirkelse (0,35 paiyz), ekpe týraly derekteri joq 1 jaǵdai (0,05 paiyz) bolǵan.
