Almaty qalasynyń bas memlekettik sanitar dárigeri Jandarbek Bekshin onlain brifing barysynda megapoliste stýdentterge vaktsina salý jalǵasyp jatqanyn aitty, dep habarlaidy QazAqparat.
«Kóptegen stýdent belsendi túrde vaktsina alýdy oqý jyly bastalmai turyp-aq bastap ketti. Mysaly, maýsym aiynda birinshi komponentin - 4 676 adam, shildede - 7 872 stýdent, tamyzda 4 733 adam saldyrdy. Kún saiyn 200-den astam stýdent vaktsina alady», - deidi ol.
Sonymen qatar, ol stýdentter vaktsina alý arqyly ózderin ǵana emes, jaqyndaryn qaýipti aýrýdan qorǵaityndaryn jaqsy túsinetinin atap ótti.
«Stýdentter men ekpe saldyrýǵa tilek bildirýshi turǵyndar Almatydaǵy 160 ekpe ortalyǵynyń birine júgine alady», - deidi Jandarbek Bekshin.
Spiker jaqyn arada Almaty emhanalarynda tumaýǵa qarsy vaktsinalaý bastalatynyn aitty. Qazirgi ýaqytta reseilik «Grippol+» vaktsinasynyń 180 myń dozasyn satyp alýǵa ótinim berildi.
