الماتى قالاسىنىڭ باس مەملەكەتتٸك سانيتار دەرٸگەرٸ جانداربەك بەكشين ونلاين بريفينگ بارىسىندا مەگاپوليستە ستۋدەنتتەرگە ۆاكتسينا سالۋ جالعاسىپ جاتقانىن ايتتى, دەپ حابارلايدى قازاقپارات.
«كٶپتەگەن ستۋدەنت بەلسەندٸ تٷردە ۆاكتسينا الۋدى وقۋ جىلى باستالماي تۇرىپ-اق باستاپ كەتتٸ. مىسالى, ماۋسىم ايىندا بٸرٸنشٸ كومپونەنتٸن - 4 676 ادام, شٸلدەدە - 7 872 ستۋدەنت, تامىزدا 4 733 ادام سالدىردى. كٷن سايىن 200-دەن استام ستۋدەنت ۆاكتسينا الادى», - دەيدٸ ول.
سونىمەن قاتار, ول ستۋدەنتتەر ۆاكتسينا الۋ ارقىلى ٶزدەرٸن عانا ەمەس, جاقىندارىن قاۋٸپتٸ اۋرۋدان قورعايتىندارىن جاقسى تٷسٸنەتٸنٸن اتاپ ٶتتٸ.
«ستۋدەنتتەر مەن ەكپە سالدىرۋعا تٸلەك بٸلدٸرۋشٸ تۇرعىندار الماتىداعى 160 ەكپە ورتالىعىنىڭ بٸرٸنە جٷگٸنە الادى», - دەيدٸ جانداربەك بەكشين.
سپيكەر جاقىن ارادا الماتى ەمحانالارىندا تۇماۋعا قارسى ۆاكتسينالاۋ باستالاتىنىن ايتتى. قازٸرگٸ ۋاقىتتا رەسەيلٸك «گريپپول+» ۆاكتسيناسىنىڭ 180 مىڭ دوزاسىن ساتىپ الۋعا ٶتٸنٸم بەرٸلدٸ.
