Almatyda kóshe qiylysynda avtokólik bes jaiaý júrginshini qaǵyp ketti, dep habarlaidy Sputnik Qazaqstan tilshisi.
Jol apaty Jandosov jáne Beregovoi kósheleri qiylysynda bolǵan. Oqiǵa kýágerleriniń aitýynsha, Subaru Tribeca Beregovoi kóshesimen ońtústik baǵytta kele jatyp, Jandosov kóshesine burylmaq bolady, biraq ol kezde baǵdarshamnyń qyzyl jaryǵy janyp, jaiaý júrginshiler joldy kesip óte bastaidy.
Subaru bes adamdy qaqqan, olardyń úsheýi eresek, ekeýi bala. Bári aýrýhanaǵa jatqyzyldy, eki áiel adam aýyr hálde.
Subaru Tribeca aidaǵan áiel adamnyń aitýynsha, kózine kún shaǵylysyp, jaiaý júrginshilerdi kórmei qalypty.
Politsiia oqiǵanyń mán-jaiyn anyqtaýda.
