Almaty qalasy Bostandyq aýdanynyń ákimi Altai Rahymbetov onlain brifing barysynda aýdannyń áleýmettik-ekonomikalyq damýy týraly aitty, dep habarlaidy QazAqparat.
Almaty qalasyn «Shetsiz qala» qaǵidaty boiynsha damytý qolǵa alynǵany belgili. Byltyr jyl aiaǵynda Almaty qalasy máslihatynyń sessiiasynda «Almaty-2050» damý strategiiasy bekitildi. Atalǵan strategiialyq qujat, eń aldymen, almatylyqtardyń ózekti máselelerin tiimdi sheshý men halyqtyń ál-aýqatyn arttyrýdy kózdep otyr.
Aýdan ákimi osyǵan orai jańadan qosylǵan «Alataý», «Ermensai», «Nurlytaý», «Jailaý»», Kókshoqy», «Almarasan», «Qarǵaly» siiaqty shaǵyn aýdandardy damytý mindeti turǵanyn aitty.
«Bul shaǵyn aýdandardaǵy kommýnaldyq-sharýashylyq máseleleri, syrtqy jaryqtandyrýmen qamtý, sapaly aýyz sý máselesin sheshý jáne jol infraqurylymy men kóriktendirýge qatysty suraqtar aldyńǵy qatarǵa shyǵady. Ótken jyly osy baǵytta birqatar jumys atqaryldy. Máselen, injenerlik jeli qurylysy boiynsha 3,4 shaqyrym sý qubyry qaita jóndeldi, 515 metr jylý qubyry jóndeldi jáne 2,9 shaqyrym elektr jelisi salyndy», - dedi aýdan ákimi.
Onyń aitýynsha, byltyr «Almagúl» shaǵyn aýdany janynan uzyndyǵy 4,8 shaqyrym elektr jelisi men qosalqy stansa salý jumysy bastalǵan. Jobanyń quny 8,6 mlrd teńge.
«Aýdan turǵyndaryn sapaly aýyzsýmen qamtamasyz etý maqsatynda Nurlytaý shaǵyn aýdanynda sý tazalaý qurylǵysyn salýǵa joba smetalyq qujattama ázirlenýde. Qazirgi tańda joba memlekettik saraptamadan ótý ústinde. Atalǵan jobanyń quny shamamen 6 mlrd teńge, joba iske asqan jaǵdaida sý tazalaý qurylǵysy táýligine 9 000 tekshe metr sý óndiredi dep kútilýde. Joba smetalyq qujattama biyl daiyn bolady. Sonymen qatar, Nurlytaý shaǵyn aýdanynda jalpy uzyndyǵy 42 shaqyrym bolatyn sý jáne káriz qubyrlarynyń qurylysyna joba smetalyq qujattama daiyndalýda», - dedi Altai Rahymbetov.
Sonymen qatar, ol Bostandyq aýdanynda birqatar aýla abattandyrylyp jatqanyn aitty.
«Bostandyq aýdanyda 1 886 kóppáterli turǵyn úi menne 655 aýla bar. 2020 jyly 120 aýla aýmaǵy abattandyryldy, sondai-aq investorlar esebinen 20 balalar alańy jańartyldy. Biyl 100 aýla aýmaǵyn kúrdeli jóndeý jáne 70 aýlaǵa JSQ ázirleý josparda. Aǵymdaǵy jóndeý jumystarymen 130 aýla aýmaǵy qamtylady», - dedi Altai Rahymbetov.
