Almatyda koronavirýs infektsiiasyn radiologiialyq keskinder arqyly diagnostikalaý úshin jasandy intellekt qoldanylady.
Bul jóninde óńirlik kommýnikatsiialar qyzmetiniń alańynda ótken onlain brifingte Tsifrlandyrý basqarmasynyń basshysy Baian Qońyrbaev, «iMedHub» jobasynyń jetekshisi Renata Ahmad málimdedi, dep habarlaidy QazAqparat.
2020 jyldyń sáýirinde Almatyda Forus Data kompaniiasy meditsinalyq keskinderdi óńdeýge arnalǵan quny shamamen 30 mln teńge bolatyn PACS serverin jasady. Ol Almaty qalasynyń Data ortalyǵynda ornalasqan.
PACS júiesi (sýretti muraǵattaý jáne bailanys júiesi) kompiýterlik jelilerdi, serverlerdi, baǵdarlamalyq qamtamasyz etýdi júzege asyrady jáne sandyq radiologiialyq keskinderdi saqtaýǵa, muraǵatqa saqtaýǵa múmkindik beredi.
Jasandy intelektini qoldaný arqyly ókpe aýrýyn diagnostikalaý úshin PACS serverine qosý jumysy Almatydaǵy birqatar aýrýhanalarda júzege asyryldy:
- I. Jekenov atyndaǵy qalalyq klinikalyq juqpaly aýrýlar aýrýhanasy;
- Qazaq onkologiia jáne radiologiia ǵylymi-zertteý institýty;
- Almaty qalasy Ulttyq ftiziopýlmonologiia ǵylymi ortalyǵy;
- Almaty qalalyq balalar klinikalyq juqpaly aýrýlar aýrýhanasy;
- Modýldik juqpaly aýrýlar aýrýhanasy;
PACS jáne qyzmetterdi qosý jumysy kelesi mekemelerde júrgizilýde:
- Almaty qalalyq Jedel meditsinalyq kómek kórsetý aýrýhanasy;
- Almaty qalalyq onkologiia ortalyǵy;
- № 12 qalalyq klinikalyq aýrýhana.
PACS - qosylǵan barlyq aýrýhanaǵa sandyq meditsinalyq keskinderge qol jetkizý múmkindigin beredi. Naýqasty bir meditsinalyq uiymnan ekinshisine jibergen kezde plionka nemese qaǵaz keskinderin qoldanýdyń qajeti joq. Sonymen qatar aýrý dinamikasyn baqylaý múmkindigi beriledi.
Dárigerler jasandy intelektini qosymsha pikir retinde qoldanady. Bul olardyń jumysyn jeńildetýge, aýrýdyń naqty diagostikasyn jasaýǵa múmkindik beredi.
Biyl maýsymda Almaty qalasy juqpaly aýrýlar aýrýhanasymen jáne I. Asfendiiarov atyndaǵy QazUMÝ-men birge «Alǵashqy simptomnyń boljamdaryn diagnostikalaý jáne jasandy intellektini aqparattyq tehnologiiaǵa engizý negizindegi COVID-19-dyń aýyr ótý qaýipiniń prediktory» qyzmetin damytý týraly kelisimge qol qoiyldy.
Qazirgi ýaqytta meditsinalyq aqparattyq júiemen birge pilottyq rejimde osy jobaǵa Ortalyq qalalyq klinikalyq aýrýhana qosyldy. Qan markerlerine arnalǵan bul qyzmet túri - aýrýdyń aýyr ótý dárejesin boljaýǵa múmkindik beredi. Sol arqyly aýrýhanalar terapiia ádisterin, reanimatsiiaǵa jatqyzý qajettiligin nemese kerisinshe bosatýdy josparlai alady.
