Almaty qalasynda koronavirýs indetinen ekinshi naýqas kóz jumdy. Ol 1963 jyly týǵan er adam, dep habarlaidy "Ult aqparat".
Almatyda COVID-19 infektsiiasynan bir naýqas kóz jumǵany jóninde buǵan deiin habarlaǵan bolatynbyz.
29 naýryzda jedel meditsinalyq járdem brigadasy azamatty «eki jaqty polisegmentarly ókpe qabynýy» diagnozymen statsionarǵa jetkizip, koronavirýs infektsiiasyna analiz alǵan. 1 sáýirde jaǵdaiynyń nasharlaýyna bailanysty ókpeni jasandy jeldetý apparatyna qosylǵan. Júrgizilgen qarqyndy terapiiaǵa qaramastan, jedel tynys alý, júrek-qan tamyrlary jáne jiti baýyr jetispeýshiligi saldarynan naýqastyń jaǵdaiy kúrt nasharlai túsken. Emdelýshiniń anamnezinde ekinshi satydaǵy qant diabeti de bolǵan.
«Búgin 10 sáýirde saǵat 18:00-de poliorgandyq jetispeýshiliktiń ulǵaiýynan júrek qyzmeti toqtady. 30 minýt ishinde ótkizilgen reanimatsiialyq is-sharalar sátsiz aiaqtaldy. Saǵat 18:30 - da biologiialyq ólim tirkeldi», - dedi Almaty qalasy Qoǵamdyq densaýlyq basqarmasynyń basshysy Tileýhan Ábildaev.
Buǵan deiin, Tileýhan Ábildaev qaitys bolǵan birinshi naýqas týraly aitqan bolatyn.
Qazir Almatyda koronavirýs infektsiiasyn juqtyrýdyń rastalǵan 123 faktisi tirkelgen. 28 adam jazylyp, úilerine shyǵaryldy.
