Almatyda COVID-19-ben kúresý úshin 100 mlrd teńgeden astam qarjy bólindi, dep habarlaidy "Ult aqparat".
2020 jyly Almatyǵa COVID-19-pen kúreske respýblikalyq biýdjetten 21,6 mlrd teńge bólindi. Al jergilikti biýdjetten 89,4 mlrd teńge qarastyryldy. Jalpy 100 mlrd astam teńge jumsaldy.
«Bul qarajat juqpaly aýrýlar aýrýhanalarynyń qurylysyna, meditsinalyq jabdyq satyp alýǵa, meditsinalyq uiymdardy dári-dármekpen qamtamasyz etýge, jedel járdem kóligin, jeke qorǵaný quraldaryn, tamaq ónimderin satyp alýǵa, ótemaqy tólemderine, azyq-túlik jáne dári-dármek turaqtandyrý qoryna, sonymen qatar, qalany aýqymdy dezinfektsiialaýǵa jumsaldy»,–dedi Almaty qalasynyń ákimi Baqytjan Saǵyntaev.
Aita keteiik, Almatydaǵy alǵashqy jańa modýldi aýrýhana sáýir aiynda paidalanýǵa berilgen bolatyn.
Onyń aýmaǵy 5850 sharshy metr,gospital bir mezette 280 naýqas qabyldai alady. Qarqyndy terapiia bólimine 28 oryn bólingen. Munda 28 ókpeni jeldetý apparaty bar. Jobaǵa sáikes, munda 281 oryndyq palata, 3 oryndyq palatalar, zerthana bólmesi, KT jáne rentgen, bronhoskopiia, ÝZD apparaty bólimi bar. 10 bir oryndyq palatanyń esigi syrttan. Ár boks jeldetý júiesimen qamtyldy. Bokstarda teris qysym jasaý arqyly batsillalardyń dálizderge taralýyna kedergi jasalady. Jyldam turǵyzylatyn ǵimarat 9 baldyq jer silkinisine tótep bere alady.
Al 300 tósek-orynǵa arnalǵan ekinshi modýldi infektsiialyq aýrýhananyń qurylysy tamyz aiynda bastalyp, 1 qazanda aiaqtaldy.
Ol «Aport» saýda oiyn-saýyq ortalyǵynyń janynda ornalasqan jáne qalalyq klinikalyq infektsiialyq balalar aýrýhanasynyń filialy sanalady. Gospital 12 bloktan turady, onyń ishinde 8 palatalyq bólim bar. Onda 300 tósek-oryn jáne 30 reanimatsiia palatasy bar. Barlyq tósekter meditsinalyq gazben jáne ókpeni jasandy jeldetý apparatyna qosylǵan.
Aýrýhana zamanaýi KT, rentgen, ýltradybystyq apparattarmen jabdyqtalǵan, sondai-aq koronavirýsqa arnalǵan PTR diagnostikasyn qosqanda zertteýdiń barlyq túrleri júrgiziletin óz zerthanasy bar.
«Ár blok jeke jumys isteidi. Adamdar palatada oqshaýlana alady. Soǵan barynsha múmkindik jasalǵan. Palata 2-3 adamǵa arnalǵan. Jýynatyn bólme,kir jýatyn oryn men ashana bólek. Aldynǵy modýldi aýrýhanalarda bular qarastyrylmaǵan. Sonymen qatar, aýrýhanada ottegi stantsiiasy bar», - deidi Almaty qalalyq balalar juqpaly aýrýlar aýrýhanasynyń bas dárigeri Erjan Seralin.
Sonymen qatar,Almatyda dári-dármekter men meditsinalyq mańyzy bar buiymdar boiynsha turaqtandyrý qory qurylǵan bolatyn. Oǵan jergilikti biýdjetten 10 mlrd teńge mólsherinde qarajat bólindi, bul 2021 jyldyń aqpanyna deiin ónimniń 69 ataýynyń qajetti qoryn qalyptastyrýǵa múmkindik beredi.
Atalǵan qordyń basty maqsaty - áleýmettik suranysqa ie dári-dármekpen jeke dárihanalar men statsionarlardy qamtamasyz etý.
«Turaqtandyrý qorynyń sheńberinde statsionarlyq emdeý nysandaryn qamtamasyz etý úshin meditsinalyq quraldardyń jalpy qory belgilegen tarifter boiynsha 5 mlrd teńge qarastyryldy, onyń 2,9 mlrd teńgesi juqpaly aýrýlar jáne provizorlyq statsionarlar, 893 mln teńgesi – emhana jelisi úshin preparattar satyp alýǵa joldanatyn bolady. Qalǵan 1,2 mlrd teńgege meditsina qyzmetkerleri jáne basqa da asa kóp suranysqa ie statsionarlyq preparattar úshin jeke qorǵanys quraldarynyń qorlary qalyptastyrylatyn bolady», - dedi Almaty qalalyq kásipkerlik jáne investitsiialar basqarma basshysynyń orynbasary Qarlyǵash Ábdijabbarova.
