Almatyda koronavirýsqa bailanysty 600-den astam is-shara toqtatyldy, dep habarlaidy "Ult aqparat".
«QR koronavirýstyq infektsiianyń taralýynyń aldyn alý sharalaryn kúsheitý týraly» Qazaqstan Respýblikasy Úkimetiniń sheshimine sáikes el aýmaǵynda, onyń ishinde Almaty qalasynda buryn josparlanǵan is-sharalardy aýystyrý nemese toqtatý týraly sheshim qabyldandy.
Almaty qalasynyń mádeniet basqarmasy kelesi shekteýlerdi engizýde: 2020 jyldyń 13 naýryzynan bastap Almaty qalasynyń aýmaǵynda barlyq buqaralyq mádeni is-sharalardy, konferentsiia, seminarlar, kórmelerdi ótkizýge ýaqytsha tyiym salý engizilsin; halyqaralyq mádeni is-sharalarǵa barý maqsatynda 1 A, 1 B, 2 jáne 3 sanattaǵy elderge shyǵýǵa shekteý qoiylsyn.
Sonymen qatar, Almaty qalasynyń mádeniet basqarmasy shahardyń barlyq tiisti uiymdary men mádeniet mekemelerine qajetti quraldarmen: sanitaizerler, antiseptikter jáne koronavirýstyq infektsiianyń aldyn alý jónindegi jadynamalarmen qamtamasyz etý boiynsha sanitarlyq-profilaktikalyq is-sharalardy kúsheitý jóninde usynystar berildi.
Mádeniet basqarmasy 2020 jyldyń birinshi jartyjyldyǵyna 40-tan astam is-sharalar josparlaǵan. Onyń ishinde, búgingi tańda 14-i toqtatylsa, qalǵan 26 shara aǵymdaǵy jyldyń ekinshi jartyjyldyǵyna aýystyryldy.
Almaty qalasy boiynsha mádeni-buqaralyq is-sharalardyń kúntizbelik josparyna sáikes monitoring júrgizildi. Onyń qorytyndysy boiynsha naýryz-sáýir ailarynda mádeni-oiyn-saýyq uiymdary boiynsha 211, al teatrlarda 383 is-sharaǵa shekteý qoiyldy. Qala boiynsha barlyǵy 608 is-shara toqtatyldy.
Sondai-aq, búginde qalada barlyq kinoteatrlar, haiýanattar baǵy, murajailar, kitaphanalar jumysyn toqtatty.
