Almatyda koronavirýs juqtyrǵandardyń sany qazir 19-ǵa jetti. Qalalyq qoǵamdyq densaýlyqty saqtaý basqarmasynyń basshysy Tileýhan Ábildaev naýqastardyń densaýlyǵy jaily aitty, dep habarlaidy "Ult aqparat".
«Ózderińizge belgili, búgin 19-shy naýqas tirkeldi. Ol Krasnodar-Máskeý-Almaty reisimen kelgen. Bul el karantin sanatyna kirmegen. Alaida ol aldynda anyqtalǵan naýqas áielmen bailanysta bolǵan soń provizorlyq emhanada jatqan bolatyn. Búgin odan alynǵan test oń nátije berdi. Ol juqpaly aýrýlar aýrýhanasyna jatqyzyldy. Qazir barlyǵy 16 adam qalalyq aýrýhanada jatyr, al balalar aýrýhanasynda - 2 bala, bir balanyń anasy jatyr. 18 adamnyń jaǵdaiy birqalypty, qanaǵattanarlyq. Eshqaisysynda kataraldy qubylys joq», - dedi ol.
Basqarma basshysynyń aitýynsha, bir adamnyń ókpesinde obstrýktivti ózgerister bolǵan soń jaǵdaiy ortasha dep baǵalanyp otyr.
«Bul adamnyń ókpesinde burynnan sozylmaly obstrýktivti ózgerister bar eken. Sozylmaly bronhit diagnozy bar. Sol úshin qazir jótel mazalaidy dep shaǵym aitady. Biraq jaǵdaiy qazir baqylaýda», - dedi basqarma basshysy.
Onyń aitýynsha, qazir Almatyda 608 adam provizorlyq emhanada jatyr. 730 adam úi karantinine oqshaýlanǵan.
