Almatyda koronavirýs juqqan meditsina qyzmetkerleri 234 adamǵa jetti. 17 sáýirde qalalyq qoǵamdyq densaýlyq saqtaý basqarmasy qalada taǵy 19 meditsina qyzmetkerinen koronavirýs tabylǵanyn habarlady.
"10-y - ortalyq qalalyq klinikalyq aýrýhana qyzmetkeri, ekeýi - statsionardyń jedel respiratorlyq virýs infektsiiasy belgileri baiqalǵan eki qyzmetkeri, bireýi jedel meditsinalyq kómek qyzmetinde isteidi, N7 qalalyq klinikalyq aýrýhananyń eki qyzmetkeri, N12 poliklinikanyń eki qyzmetkeri, kópsalaly klinikalyq aýrýhananyń eki qyzmetkeri bar" delingen qoǵamdyq densaýlyq saqtaý basqarmasynyń habarlamasynda.
Buǵan deiin 200-ge jýyq qyzmetkerinen koronavirýs tabylǵan Almatynyń ortalyq qalalyq klinikalyq aýrýhanasynyń basshysy qyzmetinen ketken bolatyn. Aýrýhana karantinge jabylǵan. Qoǵamdyq densaýlyq saqtaý basqarmasynyń habarlaýynsha, ortalyq klinikalyq aýrýhanasynda emdelgen 215 adamnan test alynyp, 18 adamnan virýs tabylǵan. 17 sáýirde olardyń sany 20-ǵa jetken.
Qalada jalpy 461 adamnan koronavirýs tabylǵan. 67 adam jazylǵan. 392 naýqas (arasynda Almaty oblysynan kelgen bir naýqas bar) aýrýhanalarda koronavirýstan emdelip jatyr. Bir adamnyń jaǵdaiy - óte aýyr, tórt adamnyń jaǵdaiy - aýyr, 92 adamnyń jaǵdaiy - ortasha aýyr, 295 adamnyń jaǵdaiy - birqalypty.
422 adam karantinge oqshaýlanǵan, úide karantinde 7992 adam bar.
