الماتىدا كوروناۆيرۋس جۇققان مەديتسينا قىزمەتكەرلەرٸ 234 ادامعا جەتتٸ. 17 سەۋٸردە قالالىق قوعامدىق دەنساۋلىق ساقتاۋ باسقارماسى قالادا تاعى 19 مەديتسينا قىزمەتكەرٸنەن كوروناۆيرۋس تابىلعانىن حابارلادى.
"10-ى - ورتالىق قالالىق كلينيكالىق اۋرۋحانا قىزمەتكەرٸ, ەكەۋٸ - ستاتسيوناردىڭ جەدەل رەسپيراتورلىق ۆيرۋس ينفەكتسيياسى بەلگٸلەرٸ بايقالعان ەكٸ قىزمەتكەرٸ, بٸرەۋٸ جەدەل مەديتسينالىق كٶمەك قىزمەتٸندە ٸستەيدٸ, N7 قالالىق كلينيكالىق اۋرۋحانانىڭ ەكٸ قىزمەتكەرٸ, N12 پوليكلينيكانىڭ ەكٸ قىزمەتكەرٸ, كٶپسالالى كلينيكالىق اۋرۋحانانىڭ ەكٸ قىزمەتكەرٸ بار" دەلٸنگەن قوعامدىق دەنساۋلىق ساقتاۋ باسقارماسىنىڭ حابارلاماسىندا.
بۇعان دەيٸن 200-گە جۋىق قىزمەتكەرٸنەن كوروناۆيرۋس تابىلعان الماتىنىڭ ورتالىق قالالىق كلينيكالىق اۋرۋحاناسىنىڭ باسشىسى قىزمەتٸنەن كەتكەن بولاتىن. اۋرۋحانا كارانتينگە جابىلعان. قوعامدىق دەنساۋلىق ساقتاۋ باسقارماسىنىڭ حابارلاۋىنشا, ورتالىق كلينيكالىق اۋرۋحاناسىندا ەمدەلگەن 215 ادامنان تەست الىنىپ, 18 ادامنان ۆيرۋس تابىلعان. 17 سەۋٸردە ولاردىڭ سانى 20-عا جەتكەن.
قالادا جالپى 461 ادامنان كوروناۆيرۋس تابىلعان. 67 ادام جازىلعان. 392 ناۋقاس (اراسىندا الماتى وبلىسىنان كەلگەن بٸر ناۋقاس بار) اۋرۋحانالاردا كوروناۆيرۋستان ەمدەلٸپ جاتىر. بٸر ادامنىڭ جاعدايى - ٶتە اۋىر, تٶرت ادامنىڭ جاعدايى - اۋىر, 92 ادامنىڭ جاعدايى - ورتاشا اۋىر, 295 ادامنىڭ جاعدايى - بٸرقالىپتى.
422 ادام كارانتينگە وقشاۋلانعان, ٷيدە كارانتيندە 7992 ادام بار.
