Almaty qalasynda politsiia qyzmetkerleri kópqabatty turǵyn úilerdiń biriniń jertólesinde zańsyz esirtki ósimdikterin ósirý deregin anyqtap, onyń jolyn kesti. Oqiǵa týraly Polisia.kz habarlady, dep habarlaidy ult.kz.
Tergeý turǵyndardan “102” arnasyna túsken habarlama negizinde bastalǵan. Kórshiler jertóle mańynda kúmándi, esirtkige tán iistiń taraǵanyn aitqan.
Oqiǵa ornyna jetken jedel-tergeý toby jertólede arnaiy jabdyqtar ornatylyp, qarasoraǵa uqsas ósimdikterdi ósirýge qolaily jasandy jaǵdai jasalǵanyn anyqtady.
Jedel is-sharalar barysynda bul iske qatysy bar adamdar da belgili boldy. Tekserý kezinde ondaǵan túp qarasoraǵa uqsas ósimdik, sondai-aq keptirilgen ósimdik tektes zattar tárkilengen.
Sonymen qatar, esirtki daiyndaýǵa arnalǵan quraldar — jaryqtandyrý júieleri, elektrondy tarazylar, vakýýmdy qaptaý qurylǵylary jáne temperatýrany baqylaý jabdyqtary alynǵan.
Almaty qalasy politsiia departamentiniń ókili Batyrjan Abdýmasarovtyń aitýynsha, mundai derekter erekshe baqylaýda.
“Quramynda esirtki zaty bar ósimdikterdi zańsyz ósirý – esirtkiniń zańsyz ainalymyna alyp keletin qylmystyq tizbektiń bir bóligi. Bul baǵyttaǵy jumystar júieli túrde jalǵasady”, – dedi ol.
Qazirgi tańda kúdiktiler politsiiaǵa jetkizilip, sotqa deiingi tergeý amaldary júrgizilýde.
