Almatyda kópqabatty úidiń terezesinen sekirmek bolǵan áiel qutqaryldy, dep habarlaidy "Ult aqparat".
Almaty qalalyq Politsiia departamentiniń málimetinshe, ózine qol salmaq bolǵan áieldi qutqarý operatsiiasy Bostandyq aýdanynda ornalasqan «Keremet» turǵyn úi kesheniniń aýmaǵynda júrgizildi.
«Tańǵy saǵat 6.40-ta osy turǵyn úi kesheniniń páterleriniń birinen shý shyqqany týraly aqparat tústi. Biz atalǵan mekenjaiǵa áriptesimiz Jalǵas Bekturovpen «Býran-153» ekipajynyń quramynda keldik. Páter syrttan jabyq boldy. Biraq ishten daýys estildi», - deidi Almaty qalalyq Politsiia departamenti patrýldik politsiia polkiniń inspektory Medet Musabaev.
Patrýldik politsiia qyzmetkerleri jergilikti turǵyndardyń kómegine júgindi.
«Tańerteńgi saǵat 7:00-de biz uiyqtap jatqanbyz. Bir áieldiń aiǵalaǵan daýysyn estidik, ol terezeden sekirmek boldy. Politsiia bizdiń tereze arqyly ózine qol salmaq bolǵan áieldi qutqaryp qaldy»,- deidi «Keremet» turǵyn úi kesheniniń turǵyny.
Politsiia inspektorynyń aitýynsha, oqiǵa ornyna páter iesi shaqyryldy.
«Biz qosymsha kilti bar páter iesin shaqyrdyq. Biraq ol kisi kelgenge deiin boijetken tórtinshi qabattaǵy páterdiń terezesinen sekirip, ózine qol jumsamaq boldy. Ol syrtaǵy konditsionerdiń ústinde turdy. Sýitsidtiń aldyn alý úshin biz besinshi qabattan arqanmen tómen túsýge májbúr boldyq. Osylaisha sýitsidke jol berilmedi, - dep qorytyndylady Medet Musabaev.
Aldyn ala málimetter boiynsha, ózine qol jumsamaq bolǵan áiel mas bolǵan.
Oqiǵanyń mán-jaiy tergeý barysynda anyqtalady.
