Almatyda 1-9 synyptardyń oqýshylary úshin sabaqtar toqtatylady, dep habarlaidy "Ult aqparat" qalalyq ákimdiktiń baspasóz qyzmetine silteme jasai otyryp.
«2018 jyldyń 26 qańtarynda aýa temperatýrasynyń 25 gradýstan tómen bolýy saldarynan Almaty qalasynyń mektepteriniń 1-9 synyptarynda sabaqtar toqtatylady», delingen Bilim basqarmasynyń habarlamasynda.
Aita keteiik, búgin 25 qańtar kúni Almatynyń birqatar mektepterinde bastaýysh synyptardyń sabaqtary toqtatylǵan bolatyn. Olar: Alataý aýdany «Zaria-Vostok» yqsham aýdanyndaǵy №150 mektebi, Bostandyq aýdany Nurlytaý yqsham aýdanyndaǵy №190-shy jáne «Qazaqfilm» yqsham aýdanyndaǵy №88, №70 mektepteri. Sonymen qatar, Bilim basqarmasynyń sheshimimen Naýryzbai aýdany Qaraǵaily yqsham aýdanyndaǵy №192 mektep pen Medeý aýdany Alataý aýylyndaǵy №7 mektepte bastaýysh synyptary mektepke barmady.
Lázzát Jylqybaevanyń aitýynsha, bul mektepter Almatynyń taýǵa jaqyn yqsham aýdandarynda ornalasqan. Keshe Almaty qalasy boiynsha TJD baspasóz qyzmetiniń jetekshisi Sandýǵash Baimýhambetova -25 gradýs aiazǵa ekpindi jel qosylǵanda Almaty mektepterindegi bastaýysh synyptarda sabaq toqtatylatynyn eskertken bolatyn.
Esterińizge sala keteiik, Qazaqstannyń birneshe oblysynda beisenbide qatty aiazdan mektepterde sabaq toqtatylyp, joldarda kólik qozǵalysy shekteldi. «Qazavtojol» respýblikalyq mekemesiniń habarlaýynsha, 24 qańtardyń keshinen beri aiazdyń kúsheiýine bailanysty Soltústik Qazaqstan, Pavlodar jáne Aqmola oblystarynda barlyq baǵyt boiynsha joldarda qoǵamdyq kólikter men dizelmen júretin kólikterdiń júrýine shekteý qoiylǵan.
Qostanai oblysynda - Qostanaidy Soltústik Qazaqstan jáne Aqmola oblysymen bailanystyratyn joldarda, Denisovka kentinen Resei shekarasyna deiingi jolda jáne Rýdnyi qalasyn Aqtóbe oblysymen bailanystyratyn jolda qoǵamdyq kólik pen dizeldi kólikterdiń jolǵa shyǵýyna tyiym salyndy. Aqtóbe oblysynda - Embi men Shalqardy bailanystyratyn jolda barlyq kólik túriniń júrine shekteý engizildi. Shyǵys Qazaqstan oblysynda - Semeiden Pavlodar oblysynyń shekarasyna deiingi jolda qoǵadyq kólik pen dizeldik kólikterdiń júrýine shekteý qoiyldy.
Pavlodar oblystyq bilim basqarmasynyń habarlaýynsha, 25 qańtarda qatty aiazǵa bailanysty mektepte birinshi aýysym oqýshylaryna sabaq toqtatyldy. Shyǵys Qazaqstan oblysy boiynsha Óskemende, Zyrian aýdanynda, Semei men Ridder qalalarynda mektepte sabaq bolmaidy.Soltústik Qazaqstan oblysynyń mektepterinde de sabaq toqtatyldy.
