Almaty ákimi Baqytjan Saǵyntaev jol qaýipsizdigi máseleleri boiynsha jumys keńesin ótkizdi, dep habarlaidy "Ult aqparat".
Sarapshylar qaýymdastyǵy jáne belsendi qalalyq qaýymdastyq ókilderiniń qatysýymen ótken kezdesýde jol-kólik infraqurylymyn jańartý, biryńǵai IT platformasyn qurý, Vizion Zero baǵdarlamasyn ózektendirý, kóliktiń mikromobildi túrlerin damytý máseleleri qaraldy.
Sonymen qatar, jaiaý júrginshilerdiń qaýipsizdigin kúsheitý úshin qaýipti jerlerde – jaiaý júrginshiler ótkelderinde, balabaqshalar men mektepterdiń janynda, sondai-aq aýlalarda kólikterdiń jyldamdyǵyn jasandy túrde tómendetý boiynsha sharalar qabyldaý usynylady. Aýdan ákimderine aýla aýmaqtaryn abattandyrý kezinde osy usynystardy eskerý tapsyryldy.
Budan ózge, qiylystardaǵy vizýaldy shýdy joiý úshin qazirgi kezde jarnama qurylǵylary jaýyp qalǵan jol belgilerine nazar aýdarý kerektigi aityldy. Megapolis ákimi Baqytjan Saǵyntaevtyń tapsyrmasy boiynsha qala kóshelerine jarnama qabyrǵalaryn ornalastyrý erejeleri ázirlenedi.
Búginde qalada joldardyń jaǵdaiy, júrgizilip jatqan jóndeý jumystary, belgiler men jolaqtardyń ornalasýy týraly málimetter bazasy joq. Tsifrlandyrý basqarmasyna IT keńesimen birge ózekti derekterdi alýǵa, jol jumysshylarynyń, politsiianyń jumystaryn úilestiretin ári qaýipsizdikti kúsheitý úshin jedel sheshim qabyldaýǵa yqpal etetin biryńǵai onlain platforma ázirleý tapsyryldy.
Kezdesý barysynda Vizion Zero baǵdarlamasyn ózektendirý, kólik strategiiasyn jasaýdy jedeldetý jáne belsendi qoǵamdastyq pen qala biligi arasyndaǵy ózara is-qimyl tiimdiligin arttyrý máseleleri sóz boldy.
Atalǵan jumystardy úilestirý jáne tiimdi sheshimderdi ázirleý úshin megapolis ákimi janynan kólik keńesi qurylady, onyń quramyna sarapshylar, sala mamandary jáne qoǵam belsendileri enetin bolady.
