Almaty politsiiasy kóktaiǵaqqa bailanysty qala turǵyndaryn saq bolýǵa shaqyrdy, dep habarlaidy QazAqparat.
«Tańǵy saǵat altydan beri megapolistiń joǵarǵy bóliginde 25-ten astam jol-kólik oqiǵasy boldy. Onyń 10-da zardap shekkender bar. Jaýyn-shashyn men kóktaiǵaq qaladaǵy kólik qozǵalysyn aitarlyqtai qiyndatatyny anyq. Keptelis paida bolyp, kólikterdiń ótkizý qabileti nasharlady», - deidi Almaty qalalyq politsiia departamenti jergilikti politsiia qyzmetiniń bastyǵy, politsiia polkovnigi Manap Sattarov.
Sondai-aq onyń aitýynsha, jol kólik oqiǵalary kóbine jol qozǵalysyna qatysýshylardyń tártip saqtamaýynan bolady.
«Kei júrgizýshiler jyldamdyqty báseńdetpeidi, tótenshe jaǵdai týǵyzady, qaýipti manevr jasaidy, bir-birin syilamaidy, jaiaý júrginshiler joldy ruqsat etilmegen jerden kesip ótedi. Osy faktorlar jol qozǵalysyna jalpy keri áser etip otyr», - dedi Manap Sattarov.
Sol sebepti Almaty politseileri joldyń qatelikti keshirmeitinin eske saldy.
«Jol qozǵalysy erejelerin saqtaý – sizdiń jáne jaqyndaryńyzdyń ómiriniń qaýipsizdiginiń kepili», - dedi politsiia.
