Foto: Almaty qalasynyń ákimdigi
Almatyda 3 tamyzdan bastap qoǵamdyq kólikte jol júrý aqysy 120 teńge bolady. Jol júrý aqysyn qolma-qol tóleý múmkindigi de alynyp tastaldy, dep habarlaidy «Ult aqparat» ákimdiktiń baspasóz qyzmetine silteme jasap.
Ai saiynǵy jol júrý kartasynyń quny 9900 teńge, stýdenttik jol júrý bileti 4200 teńge, mekteptegi jol júrý kartasy 2 myń teńge, zeinetaqy kartasy 3 myń teńge bolady.
Al Uly Otan soǵysyna qatysýshylarǵa, 75 jastan asqan zeinetkerlerge, I jáne II toptaǵy múgedektigi barlar, 18 jasqa deiingi múgedek balalar, saiasi qýǵyn-súrgin qurbandary men basqa memleketterdiń aýmaǵyndaǵy soǵys qimyldarynyń ardagerlerine tegin joldama beriledi.
Stýdentter, qart zeinetkerler, kóp balaly analar, múgedek balalardy alyp júretin tulǵalar úshin tariftiń 50% jeńildigi saqtalady.
Qalalyq mobildilik basqarmasy málimetinshe, búginde jolaýshylardyń 97%-dan astamy jol aqysyn qolma-qol aqshasyz ádispen: “Onay” kartasy, SMS arqyly, mobildi qosymsha arqyly tóleidi. Ákimdiktegiler sheteldik qonaqtarǵa yńǵaily bolý úshin qosymshada interfeisti aǵylshyn tilinde engizý pysyqtalyp jatqanyn aitty.
"Sonymen qatar jol júrý aqysyn elemeý faktilerin azaitý maqsatynda jolaýshylarǵa biletterdi tekserý, sondai-aq júrgizýshi tarapynan buzýshylyqtardy esepke alý boiynsha biryńǵai baqylaý qyzmetin qurý máselesi qarastyrylyp jatyr”, – delingen habarlamada.
Bul rette normativtik model jobasy men jańa tariftik mázir ázirlenip jatyr. Onyń aiasynda jol júrý kartalarynyń túrleri, onyń ishinde tegin aýdarymdardy júzege asyrý múmkindigi bar kartalar usynylady.
Aita keteiik, buǵan deiin Almatyda qoǵamdyq kólikte jol júrý aqysy 120 teńgege kóteriletini aitylǵan edi.
