Almatyda qoǵamdyq kólikte urlyq jasaǵan eki adam ustaldy, – dep habarlaidy Polisia.kz portaly.
Olardyń biri – 30 jastaǵy A. esimdi azamat №86 qoǵamdyq kólikte urlyq jasaǵany úshin quryqtalǵan. Qaskóidiń oljasy Samsung telefony boldy.
"Kúdikti qoǵamdyq kóliktiń jolaýshysyna 300 myń teńge kóleminde materialdyq shyǵyn keltirdi. Urynyń qarbalas ýaqytta avtobýstarǵa minip, jolaýshylardyń qaltasyn tekserip, qoǵamdyq kóliktiń bir basynan ekinshi jaǵyna deiin júrgenin arnaiy top qyzmetkerleri jedel túrde anyqtady. Qazirgi ýaqytta Jetisý aýdandyq Politsiia basqarmasy sotqa deiingi tergeý amaldaryn júrgizip jatyr. Almatynyń Naýryzbai aýdanynda osyǵan uqsas stsenarii boiynsha áreket etken taǵy bir ońai aqshany unatatyn azamat ustaldy. 40 jastaǵy K.esimdi azamat, №15 avtobýsta qart áieldiń sómkesinen uialy telefonyn urlap ketken. Bul sát beinebaqylaý kamerasyna túsip qalǵan. Tergeýdiń qazirgi kezeńinde bul kúdiktiniń osyǵan uqsas úsh qylmysqa qatysy bar ekendigi anyqtaldy", – dedi Almaty qalalyq PD Kriminaldyq politsiia basqarmasynyń bastyǵy Qýatbek Naýatov.
Eki kúdikti de ýaqytsha ustaý izoliatoryna qamaldy.
