Almatyda Zerdeli-6 shaǵynaýdanyndaǵy № 1/179 úidi qalpyna keltirý jumystary 9 maýsymda aiaqtalady. Bul týraly «Qazaq qurylys jáne sáýlet ǵylymi zertteý jáne jobalaý institýty» AQ basqarýshy direktory Eraly Shoqbarov aitty, dep habarlaidy "Ult aqparat".
Onyń aitýynsha, qisaiǵan úidi jóndeý 4 kezeńmen júrgizilgen.
«Qalpyna keltirý jumystary aqpanda bastaldy. Qazir sońǵy kezeń – úidi nyǵaitý, tikteý jumystary aiaqtaldy. Birinshi kezeńde úidi ainala irgetastyń deńgeiinen tómen filtrge qarsy ekran ornatyldy. Ekinshi kezeńde bir qatarda turǵan № 179, 178, 177 úilerdiń arasyn bóletin ekran ornatyldy. Úshinshi kezeńde úidiń qisaiǵan jaǵyna qarama-qarsy tusynan topyraq alynyp, úidiń qabyrǵasy tikteldi. Gidravlikalyq baqylaýlarǵa sáikes úidiń vertikaldy negizi tikteldi. Tórtinshi kezeńde úidiń irgetas taqtasyna bailanystyra otyryp, úi perimetri boiynsha qadalar ornatyldy. Qazir úi túbine sý ketpes úshin topyraq alynǵan tustar toltyrylyp jatyr», - dedi Eraly Shoqbarov.
Osylaisha, qalpyna keltirý jumystaryn 9 maýsymda aiaqtaý kózdelip otyr.
Eske salaiyq, Almatyda Zerdeli shaǵynaýdanynda kópqabatty úidiń qabyrǵasy bir jaǵyna qisaia bastaǵan soń turǵyndar dabyl qaqqan bolatyn.
2019 jyldyń sońǵy ailarynda bastalǵan úidiń negizi men tirek konstrýktsiialaryn júieli túrde zertteý, ǵimarattyń kún saiynǵy qisaiýyn ólsheý jáne onyń múmkin bolatyn serpinin qadaǵalaý QazQSǴZI zerthanasynyń mamandaryna osy úide turý qaýipsizdigine qatysty aldyn ala qorytyndy berýge múmkindik berdi.
Mamandardyń málimeti boiynsha, qalpyna keltirý jumystary aiaqtalǵannan keiin úi odan ári paidalanýǵa jaramdy bolady.
Qazir barlyq turǵyndar qala ákimshiligi esebinen jalǵa beriletin baspanamen qamtamasyz etilgen. Balalaryn balabaqshalar men basqa da bilim berý mekemelerine ornalastyrýǵa kómek kórsetildi.
Almaty ákimi Baqytjan Saǵyntaev esepti kezdesýinde atalmysh shaǵynaýdan turǵyndarynyń saýalyna jaýap bergen bolatyn.
