Kadr: "KTK" arnasy
Almatyda kino túsirilimi kezinde eski nómirmen kólik júrgizgen úsh adam jazalandy. Politseiler olardy bir táýlikke qamaýǵa alyp, sot sheshimine sáikes, bir jylǵa júrgizýshi kýáliginen aiyrypty. Al osy jaǵdaidan soń túsirilimdi toqtatýǵa májbúr bolǵan erli-zaiypty rejisser men prodiýser tártip saqshylarynyń áreketine narazy, dep habarlaidy "KTK" arnasy.
"Bul jerde biz jyldamdyq asyrǵan joqpyz. Kamera ornatý bar ǵoi, kinoda. Ondai ornatqan joqpyz. Eskertip, aiyppul salýǵa bolar edi. Birinshi ret bolyp tur. Biz múldem ruqsat alǵan joqpyz dei almaimyn. Aldyn ala ákimdikke, politsiia departamentine barǵanbyz. Ol qaǵazdarymyz bar. Bul iske múldem nemquraily qaraǵan joqpyz", - deidi kinoprodiýser Aisáýle Ábildá.
Oqiǵa qazannyń basynda bolǵan. Rejisser Murat Esjan men prodiýser Aisáýle Ábildá kezekti týyndysyn túsire bastaǵan. Filmde 2004 jyldy kórsetpek bolǵan olar úsh qymbat kólikti jalǵa alyp, eski nómir taǵady. Ál-Farabi dańǵylyna shyǵa bergeni sol eken, politseiler birden toqtatypty. Sóitip kólikterdi aiyp turaǵyna áketip, tizgindegi azamattar bir jylǵa júrgizýshi kýáliginen aiyrylǵan.
Tipti aýdandyq sotta da munyń film ishindegi epizod ekenin dáleldei almapty. Endi túsirilimge qatysamyn dep basy bálege qalǵan júrgizýshiler shyǵarmashylyq ujymnan 6 million teńge talap etip otyr.
"Eki ortada biz kúiip otyrmyz" degen Aisáýle Ábildá ádildik izdep álek. Al politsiia departamenti kinogerler aldyn ala túsirilim týraly eskertpegen dep otyr. Sondyqtan jaza ózgertilmeidi.
"Zań barlyq tulǵaǵa birdei. Kinoóndiris, televiziia jobalaryn túsirgende zańdy buzýǵa bolady degen norma eshbir zańda joq. Sondyqtan zańdy qatań saqtaýǵa tiis. Kinony birinshi túsirip jatqan tek bul kompaniia emes. Áriptesteri kino túsirer kezde belgilengen tártippen jalǵan nómiri bar avtokólikterdi túsirýshi alańǵa belgili evakýatormen jetkizedi. Sondyqtan belgilengen tártipte, haty da, óndirisi de jazylǵan joq. Sondyqtan nátijesi osyndai", - deidi Almaty PD resmi ókili Saltanat Ázirbek.
