Almatyda halyqtyń áleýmettik osal toptary gazǵa tegin qosylady. Bul týraly shahar ákimi Baqytjan Saǵyntaev qalalyq aktiv otyrysynda aitty, dep habarlaidy QazAqparat.
Qala ákimi keltirgen derekke súiensek, Almatyda 2 jyl ishinde gazben jabdyqtaý jelilerine 3,8 myńnan astam turǵyn úi qosyldy. Búginde turǵyndardyń 99,2% ortalyqtandyrylǵan gazben qamtylǵan.
«Qazirgi ýaqytta 1497 turǵyn úi, onyń ishinde halyqtyń áleýmettik osal toptary gazǵa qosylmaǵan kúiinde qalyp otyr. Qala biýdjeti esebinen halyqtyń áleýmettik osal toptaryn gazǵa tegin qosamyz»,- dedi ákim.
Sonymen qatar, ol «Jańa Almaty» irgeles aimaqtardy damytýdyń keshendi jospary aiasynda 428 joba iske asyrylyp jatqanyn atap ótti.
«2 jyl ishinde 178 joba iske asyryldy, 177 joba iske asyrylý satysynda, 73 joba kelesi jylǵa kózdelgen. Jospar boiynsha jyl saiynǵy qarjylandyrý shamamen 200 mlrd teńge. Búginde Úkimetpen jospar jobalary boiynsha qarjylandyrýdy ulǵaitý máselesin talqylaýdamyz», - dedi Baqytjan Saǵyntaev.
Sondai-aq ol qalanyń kommýndaldyq infraqurylymyn damytý jumystary jalǵasyn tabatynyn jetkizdi.
«2021 jyly Rysqulov – Emtsov jol airyǵynyń qurylysy aiaqtaldy, Alataý kóshesin tesý, Abai boiynsha qozǵalys ashyldy, Taýsamaly shaǵynaýdanynda Qonaev kóshesin qaita jańartý aiaqtaldy, Alataý, Naýryzbai jáne Túrksib aýdandarynyń 8 shaǵynaýdanynda, atap aitqanda Alǵabas, Shańyraq-5, Samǵaý, Ójet, Álmerek, Qairat, Nurshashqan, Quramysta 65 shaqyrymdy jańa jol salyndy», - dedi ákim.
Baqytjan Saǵyntaev biyl Buqtyrma – Qulja jol airyǵy boiynsha jumystar aiaqtalatynyn jetkizdi.
«Sonymen qatar Seifýllin – Jansúgirov qiylysyndaǵy qozǵalys ashylady. Áýezov kóshesin uzartý jumystary aiaqtalady, Saiyn kóshesin uzartý jalǵasady, Tóle bi kóshesin uzartý jumystary bastalady. Alǵabas, Álmerek, Qairat, Shuǵyla, Aqjar jáne Shapaǵat shaǵyn aýdandarynda 100 km jańa jol salynady»,- dep qosty Shahar basshysy.
