Sulpak kompaniiasy Almatyda zańsyz aǵash kesý faktisi boiynsha túsinikteme berdi, dep habarlaidy "Ult aqparat".
Kompaniia málimdemesin Facebook paraqshasynda jariialady.
«Tergeý barysynda merdiger kompaniia qyzmetkerleriniń Sulpak-qa tiesili emes jáne bizdiń kompaniiamyzǵa jalǵa berilmegen aýmaqtaǵy aǵashtardy óz erkimen kesip tastaǵany anyqtaldy. Biz quzyrly organdardyń kinálilerge zańǵa sáikes tiisti shara qabyldaitynyna senimdimiz. Biz óz otandastarymyz ben klientterimizdi túsinip otyrmyz, sondyqtan ákimdikpen birge jumys isteýge jáne qalamyzdyń ekologiiasyn jaqsartýǵa daiynbyz», – dep jazdy kompaniia.
Sonymen qatar, kompaniia basshylyǵy Almaty qalasynyń aýmaǵynda jáne qala ákimdigimen kelisilgen merzimde 500 úlken aǵash otyrǵyzý týraly sheshim qabyldaǵanyn atap ótti.
Eske sala ketsek, 23 qarashada túnde Almatyda saýda úiiniń janyndaǵy jaiqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi.
«Qazir aýdan ákimdigi men politsiia departamenti kesilgen aǵashtardyń tuqymy men sapasyn anyqtaý úshin oqiǵa ornynda jumys istep jatyr. Aiypty tulǵalar anyqtalǵan soń Politsiia Departamenti olardy jaýapkershilikke tartady. Tolyǵyraq aqparatty anyqtaý jumystary aiaqtalǵan soń jariialaimyz», - dep málim etti qala ákimdigi.
Keiin Almaty qalalyq jasyl ekonomika basqarmasy saýda úiiniń aldyndaǵy aǵashtardyń jappai kesilýiniń mán-jaiyn anyqtady.
Prezident Qasym-Jomart Toqaev Almaty qalasy Tóle bi kóshesindegi aǵashtardyń otalǵanyna qatysty jaǵdaiǵa nazar aýdardy.
Memleket basshysy Almaty ákimi Baqytjan Saǵyntaevqa atalǵan jaǵdaiǵa bailanysty qyzmettik tekserý júrgizip, kinálilerdi jaýapkershilikke tartýdy tapsyrdy.
24 qarasha kúni qala ákimi Baqytjan Saǵyntaev máseleni óz baqylaýyna alǵanynmálim etti.
Búginde Almaty prokýratýrasy zańsyz aǵash kesý faktisi boiynsha tergeý júrgizip jatyr.
