Óńirlik kommýnikatsiialar qyzmetiniń alańynda ótken onlain-brifing barysynda «Almaty» Áleýmettik-kásipkerlik korporatsiiasy» AQ basqarma tóraǵasy Asqar Bilisbekov kásipkerlikti qoldaýdyń qolda bar tetikteri týraly aitty, dep habarlaidy "Ult aqparat".
Onyń málimetinshe, shaǵyn óndiristik parkter, statsionarly emes saýda nysandary, qyzmet kórsetý ortalyqtary kiretin shaǵyn jáne orta biznesti qoldaý baǵdarlamalary – bul ÁKK qyzmetindegi mańyzdy baǵyttardyń biri.
«Qyzmet kórsetý ortalyqtaryna keletin bolsaq, bul – qyzmet kórsetý salasynda shaǵyn jáne orta kásipkerlikti damytý úshin qurylatyn úi-jailar kesheni (kiim jýý, bylǵarydan jasalǵan buiymdardy jóndeý, aiaq kiim, tehnika jóndeý oryndary, atele jáne taǵy basqalary).
Qyzmet kórsetý ortalyqtaryn qurýdyń artyqshylyqtary:
- paidalanylmai turǵan úi-jailardy rekonstrýtsiialaý;
- qyzmet kórsetý salasyndaǵy biznes úshin infraqurylymdy damytý;
- shaǵyn biznesti kóleńkeden shyǵýǵa yntalandyrý»,– dedi Asqar Bilisbekov.
Sonymen qatar, ol Almaty Finance enshiles uiymdary jáne «Almaty» mikroqarjy uiymy arqyly shaǵyn jáne orta biznesti jeńildikpen nesielendirý úshin Almaty Business-2025 baǵdarlamasy iske asyrylyp jatqanyn aitty.
«Almaty» Áleýmettik-kásipkerlik korparatsiiasy» balansynda jer ýchaskeleri men jyljymaityn múlik nysandary túrindegi aktivter bar. Olardyń negizinde áleýmettik jáne kommertsiialyq jobalar iske asyrylady. 2020 jyldyń qarasha aiynda Áýezov aýdanynda «Boks mektebi» sport zaly ashyldy. Onda kúndelikti 40-tan astam bala tegin túrde sportpen shuǵyldana alady. Sondai-aq, biyl Á. Qasteev atyndaǵy óner mektebi jumys istei bastady. Mektep balalar shyǵarmashylyǵyn dáripteý, halyqaralyq mádeni jáne bilim almasý boiynsha úlken jumystar júrgizedi, halyqaralyq festivalderge qatysady»,– dedi spiker.
Áýezov aýdanynda «Baqytty otbasy» ortalyǵy janynan kópbalaly analardy quqyqtaný, aspazdyq sheberlik, ulttyq qolóner, tigin sheberligi, sulýlyq salony qyzmetteri men qarjylyq saýattylyq boiynsha oqytatyn «Isker ana» baǵdarlamasy jumys isteidi.
«Jaqynda qabyldanǵan strategiiany jáne oryndalatyn fýnktsiialardy biriktirýdiń aǵymdaǵy protsesin eskere otyryp, qalanyń áleýmettik jáne ekonomikalyq damýynda kompaniianyń róli áli de damý ústinde. Almaty qalasynyń ÁKK kommertsiialyq qyzmetin keńeitip, investitsiialyq jobalardy júzege asyrýǵa nietti, olar jeke investorlar men kompaniianyń jeke resýrstary esebinen birlesip qarjylandyrylatyn bolady», - dep atap ótti A.Bilisbekov.
Qazirgi ýaqytta Almaty Invest jumysynda 884 mlrd teńgege 5 serpindi joba bar.
