Almatyda karaoke-bar men túngi klýbtyń ieleri jazalandy, Bostandyq jáne M.Áýezov aýdandarynda ornalasqan eki mekeme karantinge qaramastan jumys istegen, dep habarlaidy "Ult aqparat".
Tártip saqshylary klýbtarǵa kelgen kezde ishinde adam kóp bolǵan. Bireýler týǵan kún toilap jatsa, basqalary kópten beri kezdespegenderine orai jinalǵan.
«Jergilikti turǵyndar 4-yqsham aýdanda túngi klýbtyń jumys istep turǵany týraly politsiiaǵa habarlaǵan. Turǵyndardyń belsendiligi úshin rizashylyǵymyzdy bildiremiz. Tekserý nátijesinde osy mekemeden bizdiń bólimge 30 adam jetkizildi, olardyń 6-ýy personal. Klýb qyzmetkerleriniń aitýynsha, mekeme 32 jastaǵy qojaiynynyń buiryǵymen jumys istegen. Adamdar alkogol iship, bi bilep, qorqor shekken. Aitpaqshy, munyń barlyǵy infektsiianyń taralýynyń tikelei sebepshi bolatyn faktorlar. Ókinishke orai, muny azamattar bile bermeidi. Biraq karantindi saqtaý sharalary, eń aldymen, ózimizdiń qaýipsizdigimizge baǵyttalǵan», – dedi M.Áýezov aýdandyq politsiia basqarmasynyń bastyǵy Álisher Tursynbetov.
Bostandyq aýdanynyń politsiia qyzmetkerleri jumys istep turǵan karaoke klýbty áshkereledi. Munda 12 adam bolǵan. Bul jerde kelýshilerge erotikalyq massajǵa deiin kóptegen qyzmet usynyldy.
«Ustalǵandarǵa qatysty QR ÁQbK-niń 476-baby 6-bólimi boiynsha ákimshilik hattama toltyryldy. Sot sheshimimen olardyń 9-y ákimshilik qamaýǵa alyndy, qalǵandaryna 10 AEK mólsherinde aiyppul salyndy. Biz azamattardy, onyń ishinde kásipkerlik sýbektilerin tótenshe jaǵdai jáne karantin erejelerin sondai-aq, olardyń talaptaryn qatań saqtaýǵa shaqyramyz. Áitpese, sanitarlyq-epidemiologiialyq normalardy buzǵany úshin ákimshilik jáne qylmystyq jaýapkershilik qarastyrylǵan», – dedi Bostandyq aýdandyq politsiia basqarmasynyń bastyǵy Dáýren Ótebaev.
