Búgin Almatyda karantinde jatyp bosanǵan 32 jastaǵy áiel provizorlyq ortalyqtan shyqty, dep habarlaidy "Ult aqparat".
Qalalyq Qoǵamdyq densaýlyq basqarmasynyń habarlaýynsha, patsient 12 sáýirde №1 Qalalyq klinikalyq aýrýhanaǵa dene qyzýy 38 gradýsqa deiin kóterilip, jótel, tamaqtyń jybyrlaýy siiaqty kataraldy simptomdarmen túsken.
Aýrýhanada koronavirýstyq infektsiiaǵa taldaý alyndy, ol teris nátije kórsetti.
Bul kelinshektiń alǵashqy ret bosanýy ekenin aita ketý kerek.
14 sáýirde áiel bosanyp, salmaǵy 3 keli ul bala týǵan.
«Men karantinde bolǵanymda bosanýyma týra keldi. Bul meniń tuńǵyshym bolǵandyqtan óte qatty ýaiymdap edim. Buǵan deiin qasyma serik bolatyn adammen bosanýdy josparlaǵanmyn, biraq tolǵaǵym karantinge týra keldi. Biraq men meditsina qyzmetkerleriniń qamqorlyǵynyń arqasynda jalǵyzsyramadym. Meniń ata-anam qala syrtynda turady. Olardyń meni, balany ýaiymdaǵany ras. Statsionardyń meditsina qyzmetkerlerine úlken rahmet aitqym keledi. Karantin kezinde men olardan kóp nárseni úirendim, jas ana kýrsynan óttim dep te aitýǵa bolady», - dedi Ajar Manhanova.
«Búgin anasy ulymen birge qorytyndy taldaýdan keiin úiine shyǵaryldy. Anasynyń da, sábidiń de jaǵdaiy jaqsy» – dedi statsionar basshysy Ernest Qaliev.
Jalpy, qazir №1 Qalalyq aýrýhananyń perzenthana blogynda Covid-19 diagnozy rastalǵan 6 áiel jatyr. Olardyń ekeýi bosanǵan. Karantinde 24 júkti áiel bar.
