Almaty búgin túngi 00:00 bastap kúsheitilgen karantin rejimine kóshedi.
Bul týraly Óńirlik kommýnikatsiialar qyzmetindegi onlain brifing barysynda qala ákimi Baqytjan Saǵyntaev aitty, dep habarlaidy QazAqparat.
Onyń aitýynsha, koronavirýstyń taralýyna bailanysty jaǵdai áldeqaida kúrdeli bolyp otyr.
«Qaýipti baǵalamaý – jaýapsyzdyq ári zań buzǵanmen teń. Biz virýs juqtyrǵandardy anyqtaý, oqshaýlaý jáne qaýipti indettiń taralýyn boldyrmaý úshin shuǵyl túrde barlyq qajetti sharalardy qoldanyp jatyrmyz.
Bul jumysta bizge sizderdiń qoldaý kórsetkenderińiz asa mańyzdy. Memlekettik komissiianyń sheshimderin júzege asyrý maqsatynda qosymsha shekteý sharalary bekitildi.
Birinshiden, karantin rejimi kúsheiedi.
Búgin túngi 00:00 bastap adamdardyń qozǵalysyna shekteý qoiylady.
Adamdarǵa erekshe qajettilik bolmasa qalanyń ishinde júrýine bolmaidy. Tek azyq-túlik, dári-dármek, shuǵyl meditsinalyq kómek alý úshin ǵana kelýge bolady.
Qoǵamdyq oryndarǵa bir otbasynan bólek 3 adamnan artyq jinalýǵa bolmaidy. Qonaqqa baryp, qonaq kútýge tyiym salynady. 65 jastan asqan adamdarǵa úide otyrýǵa keńes beremiz. Muqtaj adamdarǵa volonterler men áleýmettik qyzmetkerler kómektesetin bolady. Kámelettik jasqa tolmaǵandarǵa úlkendersiz júrýge tyiym salynady.
Karantin aiasynda barlyq jaiaý joldar, skverler, parkter, jaǵalaýlar, sport alańdary jabyq tur. Dini uiymdardyń oryndary da jabyldy. Biraq úi janýarlaryn serýendetýge bolady.
Ekinshiden, búgingi Memlekettik komissiianyń sheshimine sáikes 30 naýryz - 5 sáýir aralyǵynda menshik formasyna qaramastan barlyq uiymdar men kásiporyndardyń qyzmeti toqtatylady. Tek qalalyq basqarý, azyq-túlik, meditsinalyq, veterinarlyq, qala qaýipsizdigin baqylaý organdary, BAQ jumysynan basqa qyzmetterdiń barlyǵy toqtaidy. Kásiporyndar tizimi saitta jariialanatyn bolady.
Bul sharalardyń barlyǵy qoǵamnyń qaýipsizdigin, densaýlyǵy men bolashaǵyn qamtamasyz etý úshin qolǵa alynyp otyr.
Bul kúnderi árqaisymyz ortaq maqsat jolynda jeke de, ujymdasyp ta azamattyq belsendiligimiz ben joǵary jaýapkershiligimizdi kórsete bilgenimiz abzal.
Biz jeke gigiena sharalaryn saqtaý men oqshaýlaný arqyly koronavirýs infektsiiasynyń taralýyn tejei alamyz.
Biz osynaý kúrdeli jaǵdaidan tek bárimiz birge kúsh jumyldyryp qana abyroimen shyǵa alamyz.
Almatylyqtar! Biz birgemiz!», - dedi Baqytjan Saǵyntaev.
