Almaty ákiminiń orynbasary Erjan Babaqumarov pen qalalyq bas sanitarlyq dáriger Jandarbek Bekshin, qalalyq Bilim basqarmasynyń basshysy Lázzat Jylqybaeva mektep direktorlarymen kezdesý ótkizdi, dep habarlaidy "Ult aqparat".
«Basty maqsat – mektep túlekterin qorytyndy attestattaý sharalaryna daiyndyqty pysyqtaý, sanitarlyq epidemiologiialyq talaptardy oryndaý, UBT ótkizý protsesiniń talaptaryn oryndaý, 1-synypqa qabyldaý sharttary talqylandy», - dedi qalalyq baspasóz qyzmetinen.
Búginde Almatyda 261 myń oqýshy bar. Biyl qalada 9 299 túlek mektep bitiredi. Olardyń 8 667-i memlekettik mektepti bitirse, 632-si jekemenshik mektep túlegi.
Qalalyq Bilim basqarmasy taratqan aqparatqa sáikes:
Bilim berý uiymdarynda oqý jyly 25 mamyrda aiaqtalady.
9-11 synyp oqýshylary úshin qorytyndy attestattaý ótkizilmeidi.
Negizgi orta jáne jalpy orta bilim beretin mektepti bitirgeni jónindegi attestattaý qazirgi baǵa boiynsha júrgiziledi.
Orta bilim berý uiymdarynyń basshylaryna elektrondy jýrnaldardaǵy baǵalardy túzeýge úzildi-kesildi tyiym salynady.
1-10 synyp oqýshylary úshin saltanatty mektep jiyny qashyqtan ótkiziledi.
11-synyp bitirgen túlekterge attestat tabystaý 3-4 maýsym kúnderi kestege sáikes barlyq sanitarlyq-epidemiologiialyq talaptardy qatań saqtaý arqyly ótedi.
«Saltanatty jiyn tek bitirýshi synyptar úshin ótkiziledi jáne oqýshylardyń arasyndaǵy áleýmettik qashyqtyq keminde 2 metrden kem bolmaýy tiis. Attestatardy tek synyptar boiynsha tabystalady. Bul sharaǵa oqýshylar, olardyń ata-analary men mektep ujymynan qosqanda shamamen 60 adamǵa ǵana qatysýǵa ruqsat etiledi. Bir synyptyń túlekteri men ekinshi synyptyń túlekterine attestat tabystaý sharalarynyń aralyǵy keminde 1 saǵat bolýy tiis. Jiynǵa túlekterdiń otbasynan tek 1-2 ata-ana ǵana kelýi kerek, olardyń egde jastaǵy atalary men ájelerine kelýden bas tartqany jón. Mektepterdiń ákimshilikteri ata-analar komitetterimen, synyptarmen jáne pedagogikalyq ujymdarmen túsindirý jumystaryn júrgizýi kerek. UBT barlyq sanitarlyq-epidemiologiialyq talaptardy qatań saqtai otyryp, ádettegi dástúrli formatta ótetin bolady», - dedi ákimdikten.
