Almaty politsiiasy karantin aimaǵynyń perimetrindegi 30 ainalma joldy japty, dep habarlaidy "Ult aqparat".
Qaladan kirý-shyǵý úshin ainalma joldardy belgileý maqsatynda jedel qyzmet jáne Almaty qalasynyń patrýldik politsiia kúshteri Almaty oblysymen shekaralas aýdandarǵa saraptama jasady.
«Saraptama barysynda 30 ainalma jol bary anyqtaldy. Bul joldardyń barlyǵy jabyldy, beton blok ornatyldy. Alataý aýdanynda - 15, Jetisý aýdanynda - 7, Medeý aýdanynda - 1, Naýryzbai aýdanynda - 4 jáne Túrksib aýdanynda - 3 jolda Ulttyq ulan sarbazdarynan jasaq qoiyldy. Ókinishke qarai, tájiribe kórsetkendei, karantin aimaǵyna kirý úshin zańsyz áreketterge baratyn adamdar barshylyq. Olar bul sharalardyń, eń aldymen, ózderiniń ómiri men densaýlyǵynyń qaýipsizdigine baǵyttalǵanyn túsinbeitin siiaqty. Arnaiy mamandandyrylǵan aýdanaralyq ákimshilik soty QR ÁQbK 476-baby (tótenshe jaǵdai erejelerin buzý) boiynsha 47 ákimshilik material qaraldy, nátijesinde 11 adam ákimshilik qamaýǵa alyndy, 36 adamǵa aiyppul salyndy», - deidi Almaty qalalyq politsiia departamentiniń bastyǵy, politsiia polkovnigi Qanat Taimerdenov.
Baqylaý-ótkizý pýnktiniń jazbasyna sáikes, bir kúnde qalaǵa 1 473 avtokólik kirdi, onyń 484-i - jeńil kólik bolsa, 985 -i - júk kóligi, onyń ishinde 1 443 adam boldy.
Bir kúnde qaladan 1 653 avtokólik shyqty, onyń 544-i - jeńil kólik, al 1104-i - júk kóligi, olardyń ishinde 1 050 adam boldy.
