Foto: Almaty ákimdiginiń baspasóz qyzmeti
Almatyda táýligine 1200 tekshe metr qardy qaita óńdeýge qaýqarly qar eritetin alǵashqy pýnkt iske qosyldy. Qala ákimi Erbolat Dosaevtyń tapsyrmasy aiasynda jańa pýnkt «Almaty Tazalyq» MKK-nyń buryn kóktaiǵaqqa qarsy reagentter saqtalǵan bazasynda salyndy, dep habarlaidy Almaty qalasy ákimdiginiń baspasóz qyzmeti.
Qazaqstanda alǵash ret munda qardy eritý úshin aǵyndy sýlardyń jylýyn paidalanatyn innovatsiialyq tehnologiia qoldanylyp otyr. Erigen sý qum men qoqystan súzgileý arqyly tazartylady, sodan keiin qalanyń káriz júiesine jiberiledi.
Qar eritý pýnktine Áýezov, Almaly jáne Bostandyq aýdandarynan qar ákelinedi. Bul aýdandarda qar úiindisi máselesi ózekti, qozǵalys qiyndaǵan ortalyq kóshelerden aq ulpany syrtqa shyǵarý ońai emes.
Mamandardyń pikirinshe, mundai sheshim qardy tiimdi túrde kádege jaratyp qana qoimai, qala infraqurylymyna túsetin júktemeni edáýir azaitýǵa múmkindik beredi.
