Almatyda qańtar oqiǵasy kezinde urlyq jasaǵan sottalýshyǵa bas bostandyǵyn shekteý jazasy taǵaiyndalyp, sot zalynan bosatyldy, dep habarlaidy QazAqparat.
Almaty qalalyq sotynyń baspasóz qyzmeti habarlaǵandai, qańtar aiynyń 6-synan 7-sine qaraǵan túni qaraǵandylyq 23 jasar azamat Maxima oiyn-saýyq kesheniniń janynan ótip bara jatqanda, terezeleriniń synǵanyn kórgen.
«Sottalýshy keshenniń ishine kirip, ekinshi qabattaǵy Prato dúkeninen quny 33 333 teńgelik Iphone-6 markaly uialy telefonyn, keiin Monamie dúkeninen quny 30 351 teńge Dior iis sýynyń eki qutysyn urlaǵan. Sotpen bul áreketter Qylmystyq kodekstiń 188-baby, 3-bóliginiń 2, 3-tarmaqtary boiynsha urlyq, iaǵni, qoimaǵa zańsyz kirý arqyly birneshe ret jasalǵan bótenniń múlkin jymqyrý dep tanyldy.
Sottalýshy óz kinásin moiyndap, basqa adamdardyń dúkenderden zat alyp jatqanyn kórgen soń ózi de kirip, taýardy urlaǵanyn alǵa tartty. Al Qylmystyq kodekstiń 188-baby, 3-bóliginiń 2, 3-tarmaqtary boiynsha eki jyldan jeti jylǵa deiingi merzimge bas bostandyǵyn shekteýge, ne sol merzimge bas bostandyǵynan aiyrý jazasy qarastyrylǵan. Sot onyń jastyǵyn, kinásin moiyndaǵanyn, shyn nietpen ókingenin jáne birinshi sottylyǵyn eskere otyryp, minimaldy eki jyl merzimge bas bostandyǵyn shekteý jazasyn taǵaiyndady», - delinedi qalalyq sottyń taratqan habarlamasynda.
Sottalýshy azamat sot zalynda qamaýdan bosatyldy. Onyń kúzetpen ustalǵan ýaqytynyń bir kúni bas bostandyǵyn shekteý túrindegi jazany óteýdiń eki kúni esebimen esepke jatqyzyldy. Úkim zańdy kúshine engen joq.
