Erteń, 16 aqpanda, sondai-aq 17 aqpanǵa qaraǵan túni Almatyda aýa temperatýrasynyń kúrt tómendeýi kútiledi. Osyǵan bailanysty qala ákimdigi kólik júrgizýshilerine úndeý jasady, dep habarlaidy "Ult aqparat".
"Qazgidromet" RMK sinoptikteriniń habarlaýynsha, Almatyda 16 aqpanda tańnan 17 aqpanǵa qaraǵan túnge deiin jańbyr jaýyp, arty qalyń qarǵa ulasady. Sondai-aq aýa temperatýrasy keshke -20 gradýsqa deiin tómendeidi.
17 aqpanda túnde -22 gradýsqa deiin, al sol kúni kúndiz aýa temperatýrasy -14 gradýs bolady dep kútiledi. Sinoptikter erteń, 16 aqpanda tańda, joldarda tuman jáne kóktaiǵaq bolady deidi.
"Túngi ýaqytta kóktaiǵaqtyń aldyn alý maqsatynda ýchaskelerde 176 qum shashatyn mashina kezekshilik etedi dep josparlanyp otyr. Qar tazalaý jumystaryna barlyǵy 483 arnaiy tehnika men 1180 jol qyzmetkeri jumyldyrylady", - dep habarlady qalalyq ákimdik.
Júrgizýshiler men jaiaý júrginshilerge aýa raiynyń qolaisyzdyǵyna bailanysty saqtyq sharalaryn ustanýǵa keńes berilip otyr. Kólik ielerinen jyldamdyqty azaityp, kólikter arasyndaǵy qashyqtyqty ulǵaityp, kenetten manevr jasamaý usynylady.
Sondai-aq ákimdik 16 aqpanda qar kúreitin arnaiy tehnika kolonnalarynyń josparly ótýine jáne 17 aqpanda túnde qardyń jappai shyǵarylýyna bailanysty almatylyqtardan kólikterdi jol jiegine qoimaýyn suraidy.
