TMD jáne Qazaqstan boiynsha tuńǵysh ret Almaty qalalyq N7 klinikalyq aýrýhanasynda jasandy intellekt kómegimen insýltty erte anyqtaýdyń radiologiialyq baǵdarlamasy engizildi, dep habarlaidy "Ult aqparat".
Bul anyqtaý júiesi «Cerebra» jasandy intellekt negizinde júzege asady.
Almaty qalalyq N7 klinikalyq aýrýhanasynyń bas dárigeri, professor Manas Ramazanovtyń aitýynsha, almatylyq jas IT-mamandardyń jasap shyǵarǵan jańa jobasyn alǵash bolyp osy aýrýhana engizdi. Ázirge júie pilottyq rejimde isteidi, alaida óziniń tiimdiligin kórsetip te úlgerdi. Jasandy intellektiń kómegi tigen alǵashqy patsient te bar.
N7 klinikalyq aýrýhananyń Qan-tamyrlary neirohirýrgiiasy bólimshesiniń dárigerleri ishemiialyq insýlt alǵan 71 jastaǵy patsientke jasandy intellekt kómegimen birinshi operatsiia jasady. Patsient atalǵan aýrýhananyń qabyldaý bólimine sol jaq denesi múldem qimylsyz, betinde assimetriiamen jáne qulaǵy esh estimeitin jaǵdaida túsken edi. Tez arada kompiýterlik tomografiia jasalyp, «Cerebra» júiesinde óńdeldi. Shuǵyl túrde bas miynyń oń jaq ortańǵy arteriiasyna mehanikalyq tromboekstraktsiia jasaldy. Operatsiiadan keiin patsient esin jiyp, eki aiaǵyn teń basatyn deńgeige jetti, tek qolynda álsizdik bar. Patsient endi ońaltý em-sharasyn qabyldamaq.
Qan-tamyrlary neirohirýrgiiasy bólimshesiniń meńgerýshisi Raýan Qastei insýlt kezinde midaǵy qan ainalymyn, aǵza jumysyn qalpyna keltirý bastapqy «altyn ýaqyt» sanalatyn 4,5 saǵatta ǵana múmkin ekenin aitady. Avtomattandyrylǵan platforma insýlttyń bar-joǵyn 5-10 minýtta anyqtap beredi jáne tez arada bas miynyń qan tamyrlaryndaǵy ózgeristi kórsetedi. Bul klinikalyq-diagnostikalyq baǵdarlama insýltty erte deńgeide anyqtap, birden ishemiiaǵa ushyraǵan aimaqty bilýge, ýaqytynda emdeýdi bastaýǵa, operatsiia jasaýǵa qarsy kórsetilimniń bar-joǵyn anyqtaýǵa, nemese trombolitikalyq terapiia jáne insýltpen túsken patsientke qajetti anyqtaý men emdeý sharalaryn atqarýǵa múmkindik beredi.
Aita keteiik, biylǵy 22 qańtar kúni QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin Almaty qalasyna jumys sapary kezinde N7 qalalyq klinikalyq aýrýhanada bolǵan edi. Ministrge «Cerebra» baǵdarlamasy tanystyryldy. Jýrnalisterge bergen suhbatynda Baǵdat Mýsin ásirese meditsina salasynda mundai jobalardyń mańyzdylyǵyn jáne jasandy intellekt negizinde ony ary qarai damytý qajettigin atap ótti. Jaqyn arada «Cerebra» jobasyn Almaty men Nur-Sultan qalalarynyń basqa da iri klinikalarynda engizý josparlanyp otyr.
