Almatyda erteń UBT bastalady. Bul týraly onlain brifing barysynda qalalyq bilim basqarmasy jalpy orta bilim berý bóliminiń basshysy Aqmaral Aitýarova málim etti, dep habarlaidy "Ult aqparat".
Onyń aitýynsha, 6 mamyr kúni biylǵy jáne ótken jyldardaǵy qala mektepteri túlekteri arasynda Ulttyq biryńǵai testileý bastalady.
«Eldegi epidemiologiialyq jaǵdaiǵa bailanysty, balalardyń densaýlyǵy men qaýipsizdigin saqtaý maqsatynda halyq kóp jinalatyn oryndarǵa barý qajettiligin boldyrmaý úshin UBT qatysý úshin túlekterdiń ótinishin qabyldaý ulttyq testileý ortalyǵynyń saitynda onlain tirkeý arqyly júzege asady. Oǵan qosa bul bitirýshi respýblika boiynsha UBT tapsyratyn oryndy óz betinshe tańdaýǵa múmkindik beredi», - deidi ol.
Sonymen qatar ol UBT tapsyrýdaǵy biylǵy erekshelikterdi atap ótti.
«Ótken jyldardaǵydai emes, biyl UBT ótetin oryn bireý ǵana. Ol ál-Farabi atyndaǵy QazUÝ-diń bazasynda ótedi. Test ótkizý formaty tek elektrondy túrde: bir testilenýshi, bir kompiýter, bir kamera printsipi boiynsha. Bir kúnde 2 lek qatysady, túske deiin jáne tústen keiin. Otyratyn oryndardyń eń kóp sany 300», - dedi Aqmaral Aitýarova.
Biyl UBT alǵash ret naýryzdan maýsymǵa deiin ótkizilip otyr. 10 naýryz ben 26 sáýir aralyǵynda JOO-ǵa aqyly negizde qabyldaý úshin erki boiynsha ótkizilgen, 6 mamyrdan 30 maýsymǵa deiin bilim berý grantyn taǵaiyndaý úshin UBT ótedi.
«Biyl alǵash ret túlekterge UBT-ny eki ret tapsyrý jáne UBT-nyń eń úzdik nátijesimen bilim berý granttaryn taǵaiyndaý konkýrsyna qatysý quqyǵy beriledi», - dedi ol.
UBT-nyń jalpy uzaqtyǵy appeliatsiiany esepke alǵanda 4 saǵat 30 minýt (270 minýt). Testileý ýaqyty - 240 minýt. 60 minýttyq testileýden keiin kózge arnalǵan jattyǵýlar úshin úzilis jáne dene shynyqtyrý úshin 2 minýt beriledi. 120 minýt testileý aiaqtalǵannan keiin 15 minýt úzilis beriledi; 180 minýt testileýden keiin kózge arnalǵan jattyǵýlar men dene shynyqtyrý jattyǵýlary úshin 3 minýt kóleminde úzilis beriledi.
