Ótken aptada Almatyda - 5, Almaty oblysynda 2 jarylys oqiǵasy boldy. Bul týraly búgin QR IIM Tótenshe jaǵdailar komitetinde ótken brifingte vedomstvo tóraǵasy Vladimir Bekker aitty, dep habarlaidy "Ult aqparat".
«Bizdiń bólimsheler politsiia qyzmeti, jergilikti atqarý organdary jáne eriktiler uiymdarymen birigip, 72 myń turǵyn úidi tekserip shyqty. Nátijesinde 131 482 adamǵa qaýipsizdik erejelerin saqtaý týraly túsindirildi», - dedi ol.
Onyń aitýynsha, qolǵa alynǵan jumystar jer úilerdegi órt oqiǵalaryn aldyńǵy aptamen salystyrǵanda 35% azaitýǵa múmkindik bergen.
«Ótken aptada Almatyda - 5, Almaty oblysynda 2 jarylys jaǵdaiy tirkeldi. Almaty qalasyndaǵy oqiǵalardyń tórteýi gaz qurylǵysyn ornatý erejeleriniń, taǵy biri ot jaǵatyn peshti iske qosý talaptarynyń saqtalmaýynan boldy», - deidi ol.
V.Bekkerdiń málimetinshe, 15 qarasha kúni Almaty qalasyndaǵy jer úide gaz ballony jarylyp, bir jáne úsh jasar eki bala aýrýhanaǵa jetkizildi.
«Balalar birinshi, ekinshi dárejeli kúiik jaraqattaryn alǵan. Olardyń bet-júzi men aiaqtarynyń 15-20% kúiip qalǵan», - dedi TJK basshysy.
