Almatyda Ekinshi dúniejúzilik soǵys ardageri, áigili Panfilov diviziiasynyń jaýyngeri Qaiyrly Jonqabaevtyń úiiniń aýlasynda saltanatty sherý ótti, dep habarlaidy QazAqparat.
Almatyda Ulttyq ulannyń áskeri qyzmetshileri Qaiyrly Jońqabaevty kele jatqan Jeńis kúni merekesimen quttyqtady. Sonymen birge QR Ulttyq ulany «Ońtústik» óńirlik qolbasshylyǵy qolbasshysynyń orynbasary polkovnik Niiaztai Álkeshev maidangerge Alǵys hat tabystap, «QR quqyqtyq tártip áskerine 30 jyl» merekelik medalimen marapattady.
Osydan soń ardager úiiniń aýlasynda Ulttyq ulannyń 5571 áskeri bóliminiń orkestri soǵys jyldaryndaǵy áskeri ánderdi oryndasa, jas sarbazdar saltanatty marshpen júrip ótti.
«Búgin biz Ekinshi dúniejúzilik soǵys ardageri Qaiyrly Ýataiulyn Jeńis kúniniń 77 jyldyǵymen quttyqtap, onyń batasyn alaiyq dep keldik. Biyl ardager 101 jasqa tolady. Jalpy, «Ońtústik« óńirlik qolbasshylyǵynda búginde kózi tiri soǵys ardagerleri qalǵan joq. Eki tyl ardageri bar. Olardy da quttyqtap, úilerine baramyz. Bizden bólek, qariialarǵa Ardagerler keńesi de ózderiniń syi-siiapattaryn kórsetti», - dedi Niiaztai Álkeshev.
Óz kezeginde maidanger Qaiyrly Jonqabaev sarbazdarǵa aq batasyn berdi.
«Denderiń saý, ómir jastaryń uzaq bolsyn! Áskeri boryshty óteý ońai emes. Degenmen, komandirdiń tilin alyp, áskeri boryshty jaqsy oryndańdar. Elimizde tynyshtyq, amandyq, bereke bolsyn! Maǵan kelip, quttyqtaǵandaryń úshin kóp rahmet!», - dedi aqsaqal.
Qaiyrly Jońqabaevtyń uly Erkin Jońqabaev ákesi Otandy súiý týraly jii aitatynyn jetkizdi.
«Ákemiz Panfilov diviziiasynyń sońǵy jaýyngeri. Biz ony maqtan tutamyz. Ol bizdi árqashan adal bolýǵa, eńbek súigish, Otan súigish bolýǵa tárbieledi. Búginde onyń bes balasy, on nemeresi men on bes shóberesi bar. Ol bizge soǵys ońai bolmaǵanyn, eki adamǵa bir vintovka berilgenin aitatyn. Ákemiz oǵan shydamai, joldasymen birge qoldaryna pýlemet alyp, maidannyń alǵy shebinde jaýmen shaiqasqan. Sondai-aq ákemiz qan maidanda joldastaryńnan aiyrylǵan óte aýyr bolatynyn aitty», - dedi Erkin Jońqabaev.
Maidangerdiń nemeresi Nurlan Hasenbaevtiń sózinshe, atasy soǵys týraly kóp áńgimeleýdi unatpaidy.
«Jalpy ol kezde qiyn boldy ǵoi. Atamyzǵa da ońai bolmaǵany anyq. Sol sebepti de ol nemerelerine sol bir jyldar týraly aitqysy kelmeitin shyǵar. Biz onyń sol ýaqytta óz Otanyn, otbasyn qorǵap, Otan aldyndaǵy boryshyn adal oryndaǵanyn jaqsy túsinemiz», - dedi Nurlan Hasenbaev.
Aita keteiik, Ekinshi dúniejúzilik soǵys ardageri Jońqabaev Qaiyrly Ýataiuly 1921 jyly 10 qyrkúiekte Shyǵys Qazaqstan oblysy, Samar aýdanynda dúniege kelgen. Eńbek jolyn 1940 jyly ShQO Qulja orta mektebinde muǵalim bolyp bastaǵan. 1941 jyly qazan aiynda Panfilov diviziiasynyń 23-shi gvardiialyq polkine Qyzyl ásker jaýyngeri qataryna alyndy.
Ardager soǵysqa basynan aiaǵyna deiin qatysqan. 8-gvardiialyq atqyshtar diviziiasy quramynda pýlemetshi bolǵan, Keńes Odaǵynyń Batyry Málik Ǵabdýllinmen bir rotada shaiqasqan. Belarýs, Polsha jáne Estoniiany azat etýge qatysqan. 1943 jyly aqpanda Rjevtegi qandy maidanda aýyr jaralanǵan, jeńisti Drezdende qarsy aldy.
Soǵystan keiin Samar aýdandyq atqarý komitetinde bólim meńgerýshisi bolyp istedi. Ári qarai aýdandyq tutynýshylar odaǵynyń júiesinde basshylyq laýazymdarda bolǵan. 1970 – 1983 jyldary Almatydaǵy «obshepit» júiesinde sharýashylyq esepteriniń direktory boldy. 1983 jyly qurmet demalysyna shyqty, bes bala tárbielep ósirdi.
Erlikteri úshin «Qyzyl Juldyz» jáne II dárejeli «Otan soǵysynyń» ordenimen, «Erligi úshin», «Máskeýdi qorǵaǵany úshin» medaldarymen jáne basqa da kóptegen medaldarmen marapattalǵan.
Eske sala keteiik, 2020 jyly Qaiyrly Jońqabaev QR Ulttyq ulany uiymdastyrǵan «Biz – Jeńistiń muragerimiz!» atty taǵzym estafetasy úshin alǵys aityp, Prezident Qasym-Jomart Toqaevqa hat jazǵan bolatyn. Óz kezeginde Memleket basshysy maidangerge jyly lebizi úshin alǵys bildirip, uzaq ǵumyr tiledi.
