Almatyda Qairat shaǵyn aýdanynda bolǵan alapat órtte «Fýdmaster» kompaniiasynyń 3 kúndik ónimi órtenip ketti, dep habarlaidy QazAqparat tilshisi.
Sút óndirý kompaniiasy ókili Aida Saparǵazinovanyń aitýynsha, tilsiz jaý qaladaǵy núktelerge jetkizilýi tiis 3 kúndik ónimdi zym-ziia etti.
«Sút ónimderi túgel janyp ketti desek bolady. Qazir shyǵyn kólemin eseptep jatyrmyz. Úsh kún shamasynda taýarlarymyzdyń jetkizý kestesi buzylady. Biraq, kompaniia basqa zaýyttarǵa júktemeni ulǵaitpaq. Osy arqyly kompaniia dúken sórelerine jetkiziletin ónimdi qamtamasyz etpek», - dedi «FýdMaster» AQ basqarma tóraiymy Aida Saparǵazinova.
Sonymen qatar, kompaniia ókilderi tótenshe jaǵdaidyń tutynýshylarǵa áseri bolmaiy dep sendirdi.
Qoima kesheniniń direktory Oleg Charlinniń aitýynsha, qoimalardyń birinde dánekerleý jumystary júrgen. Aldyn ala aqparat boiynsha órt 7-qoimadan bastalǵan.
«Sol jerde óndiris orny bolǵan. Túngi ýaqytta dánekerleý jumystary júrgizildi me joq pa sony anyqtap jatyrmyz. Munda órt dabyly, órt sóndirý júiesi jumys jasaidy. Kásipkerlerdiń qaýipsizdigi úshin barlyq sharalar qabyldanǵan», - dedi qoima kesheniniń direktory.
Eske sala ketsek, tótenshe jaǵdai búgin tańǵa jýyq bolǵan. Órtten eshkim zardap shekpedi.
